६ श्रावण २०८१, आईतवार | Sun Jul 21 2024

Logo

नेविसङ्घका संस्थापक वीरेन्द्रभक्त श्रेष्ठको निधन



नेपाली कांग्रेसको भ्रातृ संस्था नेपाल विद्यार्थी सङ्घ (नेविसङ्घ)का संस्थापक एवम् प्रजातान्त्रिक आन्दोलनका योद्धा वीरेन्द्रभक्त श्रेष्ठको आज निधन भएको छ ।  

विसं २०१८ देखि नेपाली कांग्रेसको राजनीतिमा क्रियाशील श्रेष्ठको निधनप्रति नेपाली कांग्रेसको केन्द्रीय कार्यालयका मुख्यसचिव कृष्णप्रसाद पौडेलले आज शोक विज्ञप्ति जारी गरी गहिरो दुःख व्यक्त गर्नुभएको छ । 

त्रिभुवन विश्वविद्यालय विद्यार्थी युनियनको पूर्वअध्यक्षसमेत रहनुभएका श्रेष्ठ नेविसङ्घको संस्थापक हुनुहुन्थ्यो । विसं २०४९ मा समाज कल्याण परिषद्को उपाध्यक्ष भएर काम गर्नुभएका श्रेष्ठ पार्टी र सामाजिक क्षेत्रमा क्रियाशील हुनुहुन्थ्यो । 

सम्पदा संरक्षणको क्षेत्रमा उल्लेखनीय योगदान पु-याउनुभएका श्रेष्ठले विसं २०७२ को भूकम्पपछि काठमाडौँको काष्ठमण्डप पुनर्निर्माणका लागि अभियान चलाउनुभएको थियो । राजनीतिक र सामाजिक रुपान्तरणका पक्षमा दृढ अठोटका साथ उभिने सांस्कृतिक जागरणका अभियन्ता श्रेष्ठले नेपाली कांग्रेसको सङ्गठन निर्माण र नेपालको लोकतान्त्रिक आन्दोलनका क्रममा निर्वाह गर्नुभएको सक्रिय भूमिकाको कांग्रेसले सधैँ स्मरण गर्ने बताएको छ । श्रेष्ठको निधनबाट कांग्रेसले प्रजातान्त्रिक आन्दोलनका एक अथक योद्धालाई गुमाएको मुख्यसचिव पौडेलले बताउनुभयो । 

श्रेष्ठको निधनप्रति कांग्रेस सभापति एवम् पूर्वप्रधानमन्त्री शेरबहादुर देउवाले गहिरो दुःख व्यक्त गर्नुभएको छ । सभापति देउवाले स्व श्रेष्ठप्रति भावपूर्ण श्रद्धाञ्जली अर्पण गर्दै दिवंगत आत्माको चिरशान्तिको कामना साथै शोकसन्तप्त परिवारजनप्रति पार्टी र आफ्नोतर्फबाट गहिरो समवेदना प्रकट गर्नुभएको छ ।  


प्रतिक्रिया दिनुहोस !