१० श्रावण २०८१, बिहीबार | Thu Jul 25 2024

Logo

संघीयता अभ्यासमा संवैधानिक अधिकार हस्तान्तरणमा इच्छाशक्तिको कमी- मुख्यमन्त्री शाही



काठमाडौँ- कर्णालीका मुख्यमन्त्री महेन्द्रबहादुर शाहीले संघीयतको अभ्यासको क्रममा देखा परेको केन्द्रीकृत सोच, संविधानप्रदत्त अधिकार हस्तान्तरणमा इच्छाशक्तिको कमीलगायतका समस्याहरुसँग लड्दै समृद्ध कर्णाली प्रदेश र समृद्ध नेपाल निर्माणको लागि प्रदेश सरकार दृढ रहेको बताएका छन्।

बडा दशैँको शुभकामना सन्देश दिने क्रममा सोमबार मुख्यमन्त्री शाहीले नयाँ चुनौतिका रुपमा खडा भएको कोरोना महामारीको संकटले निश्चय पनि विकास र समृद्धिको दीर्घकालीन लक्ष्यमा केही अवरोध उत्पन्न गरेको भएपनि बलिदानीपूर्ण संघर्षको प्रतिफलस्वरुप प्राप्त संघीय व्यवस्थाबाट जनताले गरेको विकास र समृद्धिको अपेक्षा पुरा गर्न योजनावद्ध रुपमा प्रदेश सरकार अघि बढेको बताएका छन्।

उनले शुभकामना सन्देशमा भनेका छन्,‘नागरिकको जीवन रक्षाजस्तो संवेदनशील विषयमा सरकार पन्छिन मिल्दैन भन्ने मान्यताका साथ लक्षणसहितका कोभिड -१९ का संक्रमित बिरामीहरुको निःशुल्क उपचारको व्यवस्थासमेत सरकारले गरेको छ।’

मुख्यमन्त्री शाहीले कोभिड -१९ ले निम्ताएको चुनौतिलाई नयाँ अवसरका रुपमा लिँदै प्रदेशमा स्वास्थ्य पूर्वाधारहरुको विकास गर्दै कोभिड नियन्त्रण, रोकथाम तथा उपचारका लागि प्रदेश सरकारले उल्लेख्य काम गरेको दाबी गरेका छन्।

उनले भनेका छन्,‘आवश्यक संख्यामा प्रदेश र जिल्ला अस्पतालहरुमा भेन्टिलेटर र आईसीयु बेड क्षमताको विस्तार, प्रयोगशालाको स्थापना,नयाँ अस्पताल भवनको निर्माण, आइसोलेसन र क्वारेन्टिन व्यवस्थापन लगायतका कामहरु भएका छन्।’


प्रतिक्रिया दिनुहोस !