१२ मंसिर २०७९, सोमबार
 |   Mon Nov 28 2022
Logo

चीनमा कोरोना भाइरस विरुद्द सिनोफार्मको खोप दस लाख मान्छेमा परीक्षण



एजेन्सी- चीनको सिनोफार्मले बनाएको कोरोना विरूद्धको खोप परीक्षणका लागि करिब १० लाख मान्छे सहभागी भएका छन् भने चीनले यो खोपको आकस्मिक परीक्षण गरेको हो। चीनले आफ्नो खोपको आकस्मिक परीक्षण गत जुलाइमा सुरू गरेको थियो। यो क्रममा तीन प्रकारका खोप प्रयोग गरिएका थिए। यी खोप कति सुरक्षित र प्रभावकारी छ भन्नेबारे क्लिनिकल रूपमा पुष्टि भने भइसकेको छैन। तै पनि यो खोप लगाएकाहरूलाई कुनै पनि किसिमका गम्भीर असर वा साइड इफेक्ट नदेखिएको जनाइएको छ। जसले यो आकस्मिक खोप लगाएका थिए उनीहरूले पनि कुनै नकारात्मक असर नभएको बताएका सिनोफार्मका अध्यक्ष लियु जिङजेनले एक अन्तर्वार्तामा भनेका छन्।

परीक्षणमा समावेश गरिएका तीनमध्ये दुई खोप सिनोफार्मकै अनुदानमा चाइना नेसनल बायोटेकले विकास गरेको हो भने अर्को सिनोभाक बायोटेकले विकास गरेको हो। यीमध्ये कुन चाहिँ खोपको नकारात्मक असर नभएको वा कुन खोप सबभन्दा बढी लगाइएको भन्ने बारे लियुले कुनै जानकारी दिएका छैनन्। रोयटर्सका अनुसार सिनोफार्मका खोपले शरीरमा निष्क्रिय भाइरस प्रवेश गराउनेछ जुन मानव कोषमा विकास हुन सक्दैन। तर यसले शरीरको प्रतिरोधात्मक क्षमता सक्रिय बनाउन भूमिका खेल्छ। क्लिनिकल परीक्षणका आधारमा हेर्दा यसको दुई डोज आवश्यक हुन्छ।

यी तीनै खोपहरूको अहिले तेस्रो चरणमा परीक्षण भइरहेको छ। यो खोप लगाएर चीनबाहिर जानेहरू करिब ६० हजार जना छन्। उनीहरूको निगरानी भइरहेको छ जसअनुसार हालसम्म कोही पनि संक्रमित नभएको सिनोफार्मका अध्यक्ष लियुले बताएका छन्। यसमा पनि तीनमध्ये कुन खोप प्रयोग भएको भन्नेबारे उनले खुलाएनन्। सिनोफार्मको खोपको नतिजा उत्साहजनक सुनिए पनि आकस्मिक प्रयोगका तथ्यांकका आधारमा मात्र यसको प्रभावकारिता तय नहुने विज्ञहरूले बताएका छन्। खोपको सही प्रभावकारिता थाहा पाउन नियन्त्रित रूपमा क्लिनिकल ट्रायल नै हुनुपर्ने उनीहरूको भनाइ छ।


प्रतिक्रिया दिनुहोस !


%d bloggers like this: