१३ माघ २०७८, बिहीबार
 |   Thu Jan 27 2022
Logo

भगाउन दबाब दिँदा महिलाको हत्या, प्रहरीले सार्वजनिक गर्‍यो प्रेमीसहितका अभियुक्त



सर्लाही, १ माघ

गत २३ पुसमा सर्लाहीको बरहथवामा मृत अवस्थामा फेला परेकी महिलाको हत्यामा संलग्न तीन जनालाई प्रहरीले सार्वजनिक गरेको छ ।

शनिबार पत्रकार सम्मेलन गरेर ईलाका प्रहरी कार्यालय बरहथवाले घटनामा संलग्नहरुलाई सार्वजनिक गरेको हो । गत १७ पुसबाट वेपत्ता भएकी बरहथवा नगरपालिका–१०, निवासी सुरत रामकी श्रीमती ३२ बर्षकी सावित्री कुमारी महराको घरबाट केही टाढा उखुबारीमा शव फेला परेको थियो । मृतक महिलाको शव सोही वडास्थित उखुबारीमा शरीरको विभिन्न भाग जलेको अवस्थामा निवस्त्र फेला परेको हो ।

घटनामा सर्लाहीको हरिवन नगरपालिका–१०, ताइवान टोल बस्ने २७ वर्षका सन्तोष साह, सोही स्थान बस्ने २७ बर्षकै मुकेश ब्लोन र २२ बर्षका रोहित हजरा संलग्न रहेको खुलेको छ । घटनाको सुक्ष्म अनुसन्धानको क्रममा उनीहरुको घटनामा संलग्नता पाहिएको इलाका प्रहरी कार्यालयका प्रमुख डीएसपी उमा शंकर यादवले जानकारी दिए । अनुसन्धानबाट मृतक महिला र अभियुक्त सन्तोष साहबीच केही समययता सम्बन्ध रहेको खुलेको छ ।

सोही सम्बन्धका कारण मृतक महिलाले अभियुक्त सन्तोषलाई आफूलाई भगाउन बारम्बार दबाब दिँदै आएकी थिइन् । विवाहित सन्तोषले भगाउन नसक्ने भएपछि गाउँकै दुई साथीलाई केही पैसा दिने लोभसमेत देखाएर हत्या गरेका प्रहरीले जनाएको हो । प्रहरीले घटनामा प्रयोग भएको एक थान मोटरसाइकल तथा घटनास्थलबाट बरामद भएको सामाग्रीसमेत पत्रकार सम्मेलनको क्रममा सार्वजनिक गरेको छ ।

मृतक महिलाका श्रीमान विगत ८/१० वर्षदेखि कामको सिलसिलामा कतारमा रहेका थिए । उनी २ वर्ष पहिला मात्र नेपाल आएर गएका थिए । उनीहरुको दुई छोरा र एक छोरी गरी तीन सन्तान छन् । मृतक महिलाको १२, ८ र ५ बर्षको सन्तान रहेको पारिवारिक श्रोतले जनाएको छ ।

यसरी भएको थियो घटना

मृतक महिलाका श्रीमान लामो समयदेखि वैदेशिक रोजगारीमा रहेका थिए । उनले कमाएको पैसाले उनीहरुले पहिलाको घरबाट केही पर केही जग्गा किनेर घर बनाएका थिए । सोही घरमा मृतक महिला र उन तीन छोराछोरी बस्ने गर्थे । श्रीमान सुरतले विदेशमा कमाएको पैसाले घडेरी किन्ने योजना बनाए । पहिलादेखि नै आफूले कमाएको पैसा श्रीमतीलाई पठाउँदै आएका थिए ।

सुरतकाअनुसार यस पटक पनि विभिन्न समयमा गरेर श्रीमतीलाई दश लाखको हाराहारीमा पैसा पठाइसकेका थिए । जग्गा किन्ने क्रममा जग्गा दलाली गर्ने सन्तोषसँग मृतक महिलाका बुवाको चिनजान भएको थियो । सोही चिनजान श्रीमान सुरत हुँदै मृतक महिलामा आएर जोडिएको थियो । जग्गा किन्न भनेर मृतकले सन्तोषलाई दुई लाख बैनासमेत दिएकी थिइन् ।

यसरी उनीहरुको नियमित भेटघाट र फोन सम्पर्क भएको प्रहरीको भनाइ छ । त्यसपछि उनीहरु नियमित भेट गर्ने विभिन्न काम पर्दा सन्तोष महिलाको घरमा पुग्ने गरेका थिए भने मृतक महिलाका श्रीमानले पठाएको पैसा उनीहरुले खर्च गरेको देखिएको छ । भेटघाटको समय बित्दै जाँदा मृतक महिलाले सन्तोषलाई आफूसँग बिहे गर्न र भगाउन दबाब दिन थालिन् ।

सोही क्रममा केही समय पहिलामात्र सन्तोषको बुवाको मृत्यु भयो । उनी केही समय बुवाको काजक्रियामा ब्यस्त भए । त्यसबाट फेरि उनी दैनिक काममा फर्किएपछि महिलाले विहेका लागि दबाब दिन थालिन् । मृतक महिलाका श्रीमान पनि घर फर्कने दिन नजिकिँदै जाँदा उनलाई तनाव बढ्दै गएको थियो । १७ पुसमा महिलाले फोनमा सन्तोषलाई आफूलाई भगाउन दबाब दिइन् ।

सन्तोषले पनि हुन्छ भनिदिए । त्यसपछि घटनामा संलग्न तिनै जना अभियुक्तहरु एक होटलमा बसेर सँगै मदिरा सेवन गरे । सोही क्रममा सन्तोषले साथीहरुसँग आफ्नो समस्या राख्छन् । साथीहरुले महिलाको हत्या गर्ने उपाय सुझाउँछन् । त्यसपछि सन्तोषले केही पैसा दिने लोभ देखाएर दुई साथीसँग सहयोग माग्छन् । साथीहरुले साथ दिने योजना बनेपछि सन्तोषले आफू लिन आउँदै गरेको बताउँदै राति ८ बजेतिर तयार बस्न महिलालाई आग्रह गर्छन् ।

त्यसपछि उनीहरु महिलाको घरतर्फ हानिन्छन् । पूर्वयोजना बमोजिम सन्तोषले दुई जनालाई कटानीस्थित उखु घारीमा लुकेर बस्न अह्राउँछन् । र आफू मृतक महिलालाई लिन जान्छन् । महिलालाई लिएर आएका सन्तोषले साथीहरुलाई लुकाएको ठाउँ आएपछि पिसाव फेर्ने बहानामा मोटरसाइकल रोकेर उनी उखु घारीतिर लाग्छन् । त्यसलगतै तिनै जना आएर महिलाको मुख र घाटीमा थिचेर हत्या गर्छन् ।

त्यसपछि उनीहरुले शव उखु बारीमा फालि दिन्छन् । घटनाको प्रमाण मेटाउने उद्देश्यले उनीहरुले महिलाको कपडा खोलेर राखी मोटर साइकलबाट बोटलमा पेट्रोल झिक्छन् । सोही पेट्रोल छर्किएर जलाउन खोज्दा उनीहरुँग लाईटर नभएपछि फेरि बरहथवा स्थित बजारमा रहेको एक पसलबाट दुईवटा चुरोट र लाइटर किनेर फेरि महिलाको शव भएको स्थानमा पुग्छन् ।

मोटरसाइकल तयारी अवस्थामा राखेर आगो लगाई उनीहरु त्यहाँबाट फर्कन्छन् । यसरी महिलाको हत्या गरेर जलाएका उनीहरुले महिलासँग रहेको ब्यागसमेत सँगै लगेका हुन्छन् । सो ब्यागसमेत केही वर सोल्टी गेट नजिकै चेक गर्दा पैसा फेला नपरेपछि ब्याग त्यही फालेर उनीहरु घर फर्कन्छन् । उक्त शव स्थानीयले देखेपछि २३ पुसमा प्रहरीले घटनास्थलको मुचुल्का तयार गरेर परीक्षणको लागि जिल्ला अस्पताल पुर्‍याउँछ ।

घटनाको एक हप्तापछि २४ पुसमा सन्तोष साह र २७ गते अन्य दुई जना मुकेश ब्लोन र रोहित हजरालाई प्रहरीले पक्राउ गरेर अनुसन्धान अगाडि बढाएको थियो । प्रहरीले घटनास्थलबाट महिलाको चप्पल, महिलालले ओढ्ने सललगायत अन्य थुप्रै मेकपका सामान र अनुसन्धानको क्रममा अभियुक्तहरुले प्रयोग गरेको मोबाइल फोन, ना ४५ प ५२०७ नम्बरको रातो कालो २२० सीसीको पल्सर मोटरसाइकलसमेत बरामद गरेको छ ।


प्रतिक्रिया दिनुहोस !


जोरबिजोर उलंघन गर्ने ६८८ सवारी कारबाहीमा



काठमाडौं । जोरबिजोर प्रणाली उलंघन गर्ने ६ सय ८८ सवारीसाधनलाई ट्राफिक प्रहरीले कारबाही गरेको छ ।काठमाडौंमा जोरबिजोर प्रणाली उलंघन गर्ने ६ सय ८८ सवारीलाई कारबाही गरिएको प्रहरीले जनाएको छ ।चार पांग्रे ७९ र दुई पांग्रे ६ सय ९ सवारीसाधनलाई कारबाही गरिएको प्रहरीले जनाएको छ ।

प्रतिक्रिया दिनुहोस !

अनुमतिबिना कसैको तस्बिर तथा भिडियो सामाजिक सञ्जालमा राख्न नपाउने



काठमाडौ । गृहमन्त्रालयले सम्बन्धित व्यक्तिको सहमतिबिना कुनै प्रकारको तस्बिर र भिडियो खिच्न तथा तिनलाई सामाजिक सञ्जालमा प्रकाशन गरेमा कारबाही हुने चेतावनी दिएको छ ।

मन्त्रालयले बिहीबार एक सूचना जारी गरी सम्बन्धित व्यक्तिको अनुमतिबिना तस्बिर खिचेर र ‘भिडियो’ बनाएर निजलाई जानकारी नै नदिई सहमति÷अनुमतिबिना सामाजिक सञ्जालमा प्रकाशन गर्ने जोसुकैलाई प्रचलित कानूनबमोजिम कारबाही हुने जनाएको हो ।

सार्वजनिकस्थलमा ख्यालठट्टाका नाममा गोप्यरूपमा भिडियो तयार गरी तिनलाई सामाजिक सञ्जालमा राख्ने गरिएको गुनासो मन्त्रालयलाई प्राप्त भएकाले नागरिकलाई शारीरिक तथा मानसिक सास्ती दिनेजस्ता गतिविधि नगर्न गृहमन्त्रालयले सम्बद्ध सबैलाई सचेत गराएको छ ।

सार्वजनिकस्थलमा गरिएका भद्दा ख्यालठट्टाबाट पीडित व्यक्तिमा मानसिक तनाव उत्पन्न हुनसक्ने, वादविवाद र द्वन्द्व तथा सामाजिक सद्भाव एवं शान्ति सुव्यवस्थामा पर्नसक्ने उसको ठहर छ ।

प्रतिक्रिया दिनुहोस !

सिके राउतको ज्यान मार्ने धम्की दिने मन्त्री रेणु यादवविरुद्ध प्रहरीमा जाहेरी



काठमाडौं । भौतिक पूर्वाधार तथा यातायातमन्त्री रेणुकुमारी यादवविरुद्ध जिल्ला प्रहरी कार्यालय गौर (रौतहट) जाहेरी दरखास्त दिएका छन् ।पूर्वसांसद तथा नेपाली कांग्रेसका नेता रञ्जित कर्णले मन्त्री यादवले साम्प्रदायिक द्वन्द्व फैलाने अभिव्यक्ति दिएको भन्दै उनीविरुद्ध राज्यविरुद्धको कसूरमा अनुसन्धान गरि कैद र जरिवाना तोक्न जाहेरी दर्ता दिएका हुन् ।

नेता कर्णले हुलाकमार्फत् जाहेरी दिएका छन् । उनले जाहेरीमा भनेका छन्, ‘बहालवाला मन्त्रीको अभिव्यक्तिले दुई समुदायबीच द्वन्द्व सृजना भई सोबाट जातिय, धार्मिक, क्षेत्रीय, साम्प्रदायिक दंगा फैलाउने दुई समुदायबीच राष्ट्रिय एकतामासमेत असर पर्ने भएकाले अन्यायी मन्त्रीको अभिव्यक्ति मुलुकी अपराध संहिता २०७४ को दफा ४९ (४) विरुद्ध रहेकाले ऐ. सहितको दफा ५ (ग) बमोजिम हदैसम्मको कैद र जरिवानासमेत गरि पाउँ ।’मन्त्री यादवले ५ माघमा रौतहटमा आयोजित मधेश बलिदान दिवसलाई सम्बोधन गर्ने क्रममा जनमत पार्टीका अध्यक्ष सिके राउतलाई ज्यान मार्ने धम्की दिएकी थिइन् ।

मन्त्री यादवको उक्त अभिव्यक्तिपछि नेता कर्णले जिल्ला प्रहरी कार्यालय सप्तरीमा जाहेरी दिन खोजेका थिए । तर, प्रहरीले जाहेरी लिन नमानेपछि जिल्ला प्रहरी कार्यालय रौतहटमा हुलाकमार्फत नेता कर्णले जाहेरी पठाएका हुन् ।कर्णले बिहीबार नै सप्तरीका प्रमुख जिल्ला अधिकारी जनार्दन गौतममार्फत् प्रधानमन्त्री शेरबहादुर देउवालाई पनि ज्ञापन पत्र पठाएको बताइएको छ ।

प्रतिक्रिया दिनुहोस !

%d bloggers like this: