२७ श्रावण २०७९, शुक्रबार
 |   Fri Aug 12 2022
Logo

बलात्कारपछि ८ महिनाको गर्भ बोकेर न्यायको याचना गरिरहेकी युवती



कैलाली । निरीह अनुहार, युद्ध हारेको सिपाहीको जस्तो भाव, कमजोर ज्यान लिएर सुखड चोकमा उभिएकी २१ वर्षीय एक महिला न्याय पाउने आसमा छिन् । कैलालीको घोडाघोडी नगरपालिका १ सुखडमा गुहरी पर्वको रौनक थियो । गुहरी पर्व थारु समुदायमा मनाइने पर्व हो । तर, मंगलबार त्यहि थारु समुदायकी एक महिला त्यहि पर्व मनाउने स्थान नजिकै न्यायको याचना गरिरहेकी थिइन् ।

‘ऊ उहाँ नै हो पीडित महिला’ गर्भमा हुर्किँदै गएको शिशुलाई सुम्सुमाइरहेकी एक किशोरीलाई देखाउँदै उनका आफन्तले भने ‘त्यो गर्भमा बलात्कारपछि हुर्किँदै गरेको शिशु हो । श्रीमानले मेरो बच्चा होइन भन्दै छोड्यो । बलात्कार गर्नेले तिरस्कार गर्न थाल्यो ।’

सस्तोमा श्रम बेच्न श्रीमान् भारत गएका बेला कैलाली घोडाघोडी नगरपालिका ११ कि २१ वर्षीया महिला बलात्कारको सिकार भइन् । ‘गाउँमै एक आफन्तको विवाहमा गएका बेला मध्यरातमा उसले बलात्कार गरेको हो’ उनका आफन्तले भने ‘कसैलाई नभन्न धम्की दिएपछि घटना लुकेको रहेछ ।’

उनका आफन्तका अनुसार महिलाले आफू बलात्कारको सिकार भएको कुरा पनि लुकाएकी थिइन्। श्रीमान् १० महिनापछि भारतबाट फर्किदा कोखमा हुर्किरहेको शिशु आफ्नो नभएको उनले थाहा पाए। उनी गएको पुसमा बलात्कारको सिकार भएकी थिइन् । असारमा मात्र श्रीमानले श्रीमतीको कोखमा हुर्किरहेको शिशु आफ्नो नभएको थाहा पाए ।

आफ्नो श्रीमतीको कोखमा पर पुरुषको शिशु हुर्किरहेको थाहा पाएपछि श्रीमतीसँग बस्न नसक्ने कुरा सुनाएका थिए । यो बिषय इलाका प्रहरी कार्यालय सुखडसम्म पुग्यो । आफूले पनि बालविवाह गरेका कारण श्रीमान् जाहेरी दिनबाट डराएका थिए र प्रहरीले पनि उनले न्याय पाउने विषयमा ठोस कुरा बताएन ।

यता महिलाले प्रहरीसँग त्यो बेला सहमतिमा शारीरिक सम्पर्क भएको बताउँछिन् । बलात्कार गर्ने युवकले पनि उनको कोखमा हुर्किरहेको शिशु आफ्नो भएको भन्दै आफू त्यसको बाबु बन्न तयार रहेको भन्दै फकाएका थिए ।उजुरी र जाहेरी दुबै नपरेपछि प्रहरीले पनि खासै चासो दिएको थिएन ।

‘सुरुमा मेरो गल्ती भयो । यो बच्चा मेरो हो भन्दै श्रीमती बनाएर राख्नु भनेको थियो । अहिले घरको न घाटको बनाएको छ’ पीडित महिलालाई न्याय दिलाउने भन्दै आएका एक पुरुषले भने, ‘अहिले त त्यो बच्चा पनि मेरो होइन भन्दै महिलालाई यातना दिइरहेको रहिछ ।’
उनले बलात्कार गरेर श्रीमती बनाउँछु भनेर लगेको पुरुषले अहिले दैनिक रुपमा गर्भवती रहेकी महिलालाई जबरजस्ती मदिरा सेवन गर्न लगाउने र कुटपिट गर्ने गरेको बताए ।

‘एक दिन त यो बच्च मेरो होइन अरू कसैको हो । त को– को सँग बसिस् भनेर हसियाले काट्ला जस्तो गरेको थियो ’ती पुरुषले भने । उनले गर्भवती रहेकी पीडित महिलालाई परपुरुषको जिम्मा लगाउने सम्मको काम भएको बताए ।

‘यो मेरो बच्चा होइन भन्दै एक अर्को व्यक्तिलाई जिम्मा लगाउन लागेको थाहा पाएपछि महिलाले माइतीलाई फोन गरेकी हुन्’ उनले भन् ‘अहिले घटना बाहिर आउँदा पनि न्याय नपाइने हो कि भन्ने चिन्ता छ । पीडित पक्षले इलाका प्रहरी कार्यालय सुखडमा मंगलबार मुद्दा दर्ता गराउन खोजेका थिए । उनीहरुको मुद्दाको प्रकृति मिलेन भन्दै प्रहरीले त्यो दिन मुद्दा दर्ता गरेन । बुधबार फेरि जबरजस्ती करणीमा उनीहरुले दर्ता गराए ।

लामो समय पनि घटना बाहिर आएका कारण न्याय नपाउने हो कि भन्ने चिन्ता अहिले पीडित पक्षमा देखिन्छ । यता प्रहरीले यथेस्ट प्रमाण नहुँदा मुद्दा कमजोर हुन सक्ने बताउँछ ।


प्रतिक्रिया दिनुहोस !


ताजा

लोकप्रिय