काठमाडौं । सत्तारुढ दल नेपाली कांग्रेसले मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचनमा भएको अन्तर्घातको विवरण केन्द्रमा पठाउन निर्देशन दिएको छ । केन्द्रीय अनुशासन समितिले पुष १५ गतेभित्र केन्द्रमा आइपुग्ने गरी विवरण पठाउन निर्देशन दिएको हो ।
समिति संयोजक आनन्द ढुंगानाले तल्ला तहमा रहेका समितिहरुलाई विवरण बुझाउन आइतबार निर्देशन दिइएको जानकारी दिए ।
कांग्रेसभित्र अन्तर्घात र असहयोग भएको भन्दै चुनाव हारेका नेताहरु सार्वजनिक रुपमा बोलिरहेका छन् । गठबन्धनका उमेदवारमात्र होइन, पार्टीका आधिकारिक उमेदवारलाई समेत हराउन आफ्नै दलभित्र लागि परेको गुनासो अहिले बढ्दो छ । पराजित उमेदवारहरुले पत्रकार सम्मेलन गरेर र सामाजिक सञ्जालबाट गुनासो गरिरहेका छन् ।
संयोजक ढुंगानाका अनुसार अन्तर्घात भएको र असहयोग गर्ने नेता र पार्टी सदस्यहरुको नाम समावेश गरेर निर्णयसहित विवरण पठाउन क्षेत्रीय, जिल्ला र प्रदेश अनुशासन समितिलाई निर्देशन दिइएको हो ।
“चुनावमा अन्तर्घात भएको र असहयोग गरेकाहरुको विषयमा निर्णय गरेर पुष १५ भित्र केन्द्रीय अनुशासन समितिमा पठाउन आज निर्देशन जारी भएको छ,” उनले भने, “विवरण आएपछि केन्द्रीय अनुशासन समितिले आफ्नो काम कारबाही अघि बढाउँछ ।”