नृृत्यका विश्व कीर्तिमानी दिदीबहिनी म्यूजिक भिडियोमा व्यस्त « Name of Truth News : News Portal in Nepal
   ३० आश्विन २०७८, शनिबार
 |   Sat Oct 16 2021
Logo

नृृत्यका विश्व कीर्तिमानी दिदीबहिनी म्यूजिक भिडियोमा व्यस्त



काठमाडाैं । नृत्यको माध्यमबाट आफ्नो मात्र नभएर देशको नाम विश्व सामू चिनाउन सफल रुबिसा र एलिसा श्रेष्ठ अहिले म्यूजिक भिडियोमा व्यस्त हुनुहुन्छ । उहाँहरु दुबैजना दिदीबहिनी हुनुहुन्छ । उहाँहरु केही महिना अघि लगातार ४१ घण्टा ५ मिनेट लोक नृत्य गरी गिनिज बुक अफ वल्र्ड रेकर्डस्मा नाम लेखाउन भएको थियो ।

यसअघि यो कीर्तिमानी संयुक्त राज्य अमेरिकाका नागरिक ब्रेट ग्रिसवल्र्ड र जेनिफर ग्रिसवर्ल्डको नाममा छ । उनीहरुले ३८ घण्टा ३८ मिनेट निरन्तर नृत्य गरेका थिए ।

विभिन्न म्युजिक भिडियोमा नृत्यमा व्यस्त श्रेष्ठ भन्नुहुन्छ, ‘मैले म्युजिक भिडियोमा अभिनय गरेको होइन, नृत्य गरेको हो । नृत्यको माध्यमबाट केही गर्ने इच्छा भएकाले गिनिज बुक अफ वल्र्ड रेकर्डस्मा नाम लेखाउन सफल भएँ ।’

चन्द्रागिरी नगरपालिका वडा नम्बर ६ स्थायी घर भएको उहाँहरु सानैदेखि नृत्यमा रुचि राख्नुहुन्थ्यो । आफ्नो बुवाको प्रेरणाको कारण नृत्यमा लाग्नुभएको श्रेष्ठद्वयले सानै उमेरदेखि विभिन्न कार्यक्रममा सहभागिता जनाउँदै आउनुभएको छ । टंक बुढाथोकीको ‘मन विनाको धन ठूलो’ बोलको गीतबाट म्युजिक भिडियोमा प्रवेश गर्नुभएको श्रेष्ठद्धयले एक दर्जन भन्दा बढी म्युजिक भिडियोमा आफ्नो नृत्य प्रस्तुत गरिसक्नुभएको छ ।

दुर्गेश थापाको तीजको गीतमा समेत आफ्नो नृत्य प्रस्तुत गरिसक्नुभएको श्रेष्ठ द्धयले नृत्यबाट मनोरञ्जन मात्र नभएर शरीरलाई स्वस्थ पार्न सकिने बताउनुहुन्छ ।

रुबिसा हाल स्नातक दोस्रो वर्ष तथा एलिसा स्नातक पहिलो वर्षमा अध्ययनरत हुनुहुन्छ । उहाँहरुले राष्ट्रपति विद्यादेवी भण्डारीको हातबाट प्रमाणपत्र प्रदान गरिसक्नुभएको थियो । विश्व कीर्तिमानी राखेका दुई दिदीबहिनीलाई राष्ट्रपति भण्डारीले नेपालको छोरीले नेपालको नाम राख्न सफल भएकोमा खुसी व्यक्त गर्दे आफ्नो तर्फबाट सक्दो सहयोग गर्ने प्रतिबद्धता जनाउनुभएको थियो ।


प्रतिक्रिया दिनुहोस !


मलिका महत फिल्ममा फ्लप, म्युजिक भिडियोमा हिट



काठमाडौं । पछिल्लो समय भिडियोमा खोजिनेमध्येकी एक मोडल हुन्, मलिका महत । फिल्म यात्रा : म्युजिकल भ्ल्ग मार्फत रजतपटमा डेब्यु गरेकी मलिकाले दोस्रो फिल्म ‘पानीफोटो’मा समेत अभिनय गरिसकेकी छिन् । फिल्ममै आफूलाई स्थापित गर्ने तयारीमा रहेकी मलिका केही समययता भिडियोमा व्यस्त छिन् । फूलबुट्टे सारी’ मा अभिनेता पल शाहसँग देखिएपछि दर्शकमाझ उनको लोकप्रियता बढ्दो छ । दर्शकले पल र मलिकालाई ’पिएम’ जोडीसमेत भन्न थालिसकेका छन् । भिडियोमा अभिनय गर्न थालेको केही समयमै उनको आँखामा आउने सपनी, टाढा भए पनि, तिम्रो मनमा ए कान्छा लगायतका गीत दर्शकले सर्वाधिक रुचाएका छन् ।

भिडियोमा पछिल्लो समय खोजिने मोडलको लिस्टमा मलिकाको नाम अगाडि आए पनि फिल्ममा भने उनले त्यो लोकप्रियता पाउन सकेकी छैनन् । उनले दुई फिल्ममा अभिनय गरे पनि ’पानीफोटो’ भने प्रदर्शन हुन बाँकी छ । तर, उनको भिडियोझैँ लोकप्रियता फिल्ममा भने कम छ । केही दिन अगाडि मात्र फिल्म ’सत्यम’मा अनुबन्धित् भएकी मलिका आफूलाई फिल्ममै सफल देख्न चाहन्छिन् । केहि समयअगाडि मात्र उनी एक प्रतिष्ठित ब्यानरको अडिसनमा रिजेक्ट भएकी थिइन् । उनले पाएको रोललाई अडिसनमा न्याय गर्न नसकेपछि उनलाई लिन नसकिएको उक्त फिल्मको टिमका एक सदस्यले बताए ।

प्रतिक्रिया दिनुहोस !

सेलिब्रेटीका दसैँ योजना



बडा दसैँ नेपालीको घर आँगनमा प्रवेश गरिसकेको छ । अघिल्लाका बर्ष झै यसपालि पनि कोरोना संक्रमणको त्रास कायमै रहेकाले स्थिति त्यत्ति सहज भइसकेको छैन । यद्यपि, परम्परालाई निरन्तरता दिँदै चाडपर्व भने सबैले मनाउने गरेका छन् । चाडबाड मनाउन सर्वसाधारणले झै सेलिब्रेटीले विशेष योजना बनाउँने गरेका छन् । सेलिब्रेटीहरूलाई यसवर्षको दसैँलाई कसरी मनाउँदै हुनुहुन्छ भनेर न्युज कारखानाका लक्ष्मण सुवेदीले प्रश्न गरेका छन् । हेरौं उनीहरूको जवाफ

बल्ल दसैँ आए जस्तो लागेको छ : भुवन केसी

गत बर्ष कोरोनाका कारण जारी लकडाउनले निकै सकसका साथ दसैँ मनाउनु परेको थियो । तर यसपालि भने लकडाउन छैन, स्थिति अलि सहज छ । तर, सावधानी भने अपनाउनै पर्छ । म सर्वसाधारणले झै समान्य तवरले दसैँ मनाउँछु । बुबाआमा, मान्यवरको हातबाट टीका लगाएर आशीर्वाद लिने, आफन्त, आफूभन्दा सानालाई टीका लगाइदिने ।

यो दसैँमा फूलपातीको दिनबाट मेरो बिशेष भूमिका रहेको सिनेमा ‘डाडाको वरपीपल’ प्रदर्शनमा आएको छ । कोरोनाका कारण ठप्प रहेको सिनेमा क्षेत्र चलायमान बनाउन फिल्म प्रदर्शन हुन जरुरी छ । सोभित बस्नेत भाईले निरन्तर रुपमा फिल्म निर्माण गर्दै प्रदर्शन गरिरहेका छन् । मलाई बल्ल यसपालि दसैँ आएझैं महशुस भएको छ । सबैको फिल्म चलोस्, दुर्गा भवानीले आशीर्वाद दिउन्, सम्पूर्ण नेपाली दाजुभाई दिदीबहिनीमा बडा दसैँको हार्दिक शुभकामना ।

पिङ चाहिँ खेल्नु पर्ला : रेखा थापा

यसपालि अघिल्लो बर्षभन्दा माहोल अलि रमाइलो छ । तर हामीले सावधानी चाहिँ अपनाउनै पर्छ । कोरोनाले गर्दा गतबर्ष त दसैँ साहै्र खल्लो भयो । यसपालि भने सबैतिर अलि सहज वातावरण छ । त्यसैले दसँैको रौनक अलि बढेको पाएकी छु । म यसपालि काठमाडौंमै दसैँ मनाउँछु । मम्मीको हातबाट टीका लगाउँछु । सामाजिक दुरी कायम राख्दै आफन्तको हातबाट टीका लगाइ आशीर्वाद लिन्छु । यो दसैँमा स्पेसल त्यस्तो केही प्लान छैन । हलमा फिल्म प्रदर्शन हुन थालेको देख्दा खुशी लागेको छ । घर नजिकै सिफल चौरमा पिङ हालेका छन् । टीकाको दिन भुइँ छोड्नु पर्छ रे, त्यहाँसम्म पुगेर पिङ चाहिँ खेल्नु पर्ला ।

दसैँ छैन, पोखरा घुम्न जाने प्लान छ : दीपकराज गिरी

ठूली आमाको स्वर्गारोहणका कारण यसपालि दसैँ छैन । तर पनि दसैँ आउँदा मलाई अर्कै रौनक लागेको छ । कोरोनाका कारण अहिले पनि सबैमा त्रास छ । एकदम सुरक्षित भएर चाडपर्व मनाउनु पर्ने छ । बजारमा देखिएको भिडभाडले साँच्चै नै दसैँ आएको महशुस गराएको छ । तर यसले संक्रमण बढ्ने हो की भन्ने डर छ । यसपालि टीका नभएकाले दसैँमा कतै घुम्न जाने की भन्ने सोचमा छु । बिदेश घुम्न जानलाई पिसिआर टेस्ट, के के चाहिन्छ, त्यतिन्जेल त आफ्नै देशको जुनसुकै स्थानमा पुगिन्छ । पोखरा जाने की भन्ने सोचेको छु । दसैँ नभए ता पनि नेपाली दाजुभाई दिदीबहिनीमा दसैँ को हार्दिक मंगलमय शुभकामना व्यक्त गर्न चाहन्छु ।

जुठो परेकाले दसैँ छैन : पूजा शर्मा

जुठो परेकाले मेरो यसपालि दसैँ छैन । मलाई खासमा दसैँ भन्दा तिहार मनपर्छ । झण्डै दुई बर्षयता कोरोनाका कारण सबैलाई घरमा थन्क्याइ रहेको थियो । अब भने स्थिति सामान्य बन्दै गइरहेको छ । फिल्म पनि रिलिज हुन लागेको छ । त्यसैले यसपालि धेरै खुशी लागेको छ । टीका लगाउन नहुने भए पनि दसैँले आफ्न्त, आफ्ना मान्छे भेटघाट, कुराकानी गर्ने अवसर जुटाइदिन्छ । त्यो नै खुशीको कुरा हो । म सम्पूर्ण नेपालीमा दसैँको हार्दिक शुभकामना व्यक्त गर्न चाहन्छु ।

सर्तक भएर मनाउनुपर्छ–जीतु नेपाल

दसैँकै लागि भनेर खासै कुनै योजना बनाएको छैन । विगतका दुई बर्षका दसैँ कोरोनाको भयले खल्लो बनायो । यसपालि भने अलि खुल्न पाइएको छ । तर सर्तक भने हुनैपर्छ । घरपरिवार, आफन्तसँग टीकाजमरा लगाएर, ठूलाबाट आशीर्वाद लिएर, सानालाई आशीर्वाद दिएर दसैं मनाइन्छ । सुसुराली जाने, खाइपीइ गर्ने, पिङ खेल्ने योजना छ ।

यसपालिको दसैँ नयाँ मान्छेसँग–प्रियंका कार्की

यसपालिको दसैँ मेरा लागि बिशेष छ । भर्खरै घरमा नयाँ मान्छे (छोरी) को आगमन भएको छ । हरेक दिन दसैँ जस्तो फिल भइरहेको छ । बितेका दुई बर्षभन्दा यसपालि वातावरण अलि खुला छ । तर पनि सुरक्षित तवरले दसैँ मनाउनु पर्छ । म पहिलाका बर्षहरूमा झँै सामान्य तवरले परम्परा निभाएर दसैँ मनाउँछु । यसपालि छुट्टै केही प्लान बनाएकी छैन । सानोमा दसैँ भन्ने बित्तिकै नयाँ कपडा, टीका लगाएर पाइने दक्षिणको लोभ लाग्थ्यो । अहिले भने अझ प्रगति होेस् भन्ने मान्यजनको आशीर्वाद प्यारो लाग्छ ।

परिवार भेटघाट, खाइपीइ गरिन्छ –आश्मा गिरी

पछिल्ला दुई वर्षको दसैँ खुलेर मनाउन पाइएन । यसपालि पनि पूर्ण रुपले त्रासविहीन चाहिँ हुन सकिएका छैन । तर पनि लकडाउन नभएकाले स्थिति सामान्य बन्दै गइरहेको छ । त्यसैले यसपालि आफन्तहरूकोमा गएर टीका लगाइ दसैँ मनाउन पाइने भएको छ । दसैँ मलाई मन पर्ने पर्व हो । बाबा मम्मी, हजुरबुबा, हजुरआमाको हातबाट टीका लगाइ आशीर्वाद लिने, परिवारका सबै सदस्य जम्मा हुने, खानपीन, नाचगान गर्ने, हल्का तास पनि खेल्ने गरिन्छ ।

दर्शकसँग दसैँ मनाउँछु –सलोन बस्नेत

मलाई दसैँ मन पर्छ । दसैँ आउँदैछ भन्ने बित्तिकै कताकता रमाइलो लाग्छ । यसपालि त फूलपातीको दिनदेखि हाम्रो फिल्म ‘डाडाँको बरपीपल’ रिलिज भएको छ । त्यसैले यो दसैँ दर्शकमाँझ मनाउने योजना छ । कोरोनाका कारण यत्तिका समय हल बन्द थिए । ‘डाँडाको बरपीपल’ बाट फिल्म प्रदर्शन सुुरु भएको छ । दसँैको यो माहोलमा फिल्मप्रेमी सबैलाई हलमै गएर फिल्म हेरिदिनुहुन अनुरोध गर्दछु ।

घर, माइती दुवैतिर पुगिन्छ–टीका प्रसाईं, गायिका

गत बर्ष कोरोना महामारीले गर्दा चाडपर्वमा समेत हिड्डुल गर्न सकस भयो । यसपालि भने स्थिति समान्य बन्दै गएको छ । त्यसैले यो दसैँ सिन्धुली र झापा पुगेर मनाउने योजनामा छु । घर र माइती, दुवैतिर पुगिन्छ । अब माहोल समान्य बन्दै गइरहेको छ तर पनि भीडभाडदेखि बचेर दसैं मनाउनु हुन म सबै जनामा आग्रह गर्छु । मेरो सम्पूर्ण शुभचिन्तकलाई बडा दसैँको हार्दिक शुभकामना व्यक्त गर्न चाहन्छु ।

प्रतिक्रिया दिनुहोस !

प्रहरीको दसैँ : मासुभात खाने, ड्युटी गर्ने, ब्यारेकमै टीका र शान्ति सुरक्षामा केन्द्रीत



न्युज कारखाना ।

काठमाडौं । चाडपर्वमा सबै रमाइरहँदा प्रहरी भने चनाखो हुन्छ । फेस्टी मुडमा हुनसक्ने दुर्घटना, अपराध, विकृति रोक्न सुरक्षाकर्मी खटिन्छन् । विदा र घरपरिवार भन्ने हुँदैन । प्रहरी कार्यालय नै घर र सहकर्मी नै परिवारजस्तो हुन्छ । कुनै अप्रिय घटना र चिन्ताबिना ढुक्कसँग नागरिकले चाडपर्व मनाउन पाए भने प्रहरीलाई खुसी मिल्छ । घरमा टीका लाउन नपाएको खल्लोपना हराउँछ । फौजको नियमै हो प्रतिकूल र अफ्ठेरो परिस्थितिमा सेवा गर्नु । तर पनि मानवीय स्वभावले चाडपर्वमा घर जान नपाउँदा, विदा नपाउँदा मन खल्लो भइहाल्छ । यसलाई हटाउन प्रहरी कार्यालयमै पनि दसैं मनाउने गरिन्छ ड्युटीलाई असर नपर्नेगरी । यसपालि पनि दसैंमा यसरी नै मनाउने तयारी प्रहरीको छ । न्युज कारखानाले प्रहरी अधिकृतसँग फौजी दसैंबारे कुराकानी गरेको छ ।

शैलेश थापा क्षेत्री, प्रहरी महानिरीक्षक (आईजीपी)

मेरो त्यस्तो विशेष योजना केही छैन । पुलिसको अफ ड्युटी हुँदैन । मातहतसँग अल द टाइम जोडिनुपर्छ । त्यसकारण व्यक्तिगत दसैं हुँदैन । विदाको दिन पनि जागिर खाने हो । मेरो घर उपत्यकामै भएकाले एकछिन समय निकालेर आम नागरिकजस्तै टीका लगाउँछु । बुवाआमा हुनुहुन्छ । उहाँहरुबाटै टिका लगाउँछु । पारिवारिक घुमघाम र अध्ययनका लागि मैले फुर्सद नै पाउँदिन । फोन उठाउन त भ्याउँदिन । देशभरीको सुरक्षाको कुरा हुन्छ । यसमै केन्द्रीत हुने हो । ब्यारेकभित्र आ(आफ्नो युनिटले, आ(आफ्नो शैलीमा शान्ति सुरक्षाको बहाली राख्दै एकप्रकारको परम्परागत अभ्यासमा मनाउने हुन्छ । सेक्युरिटीलाई कम्प्रमाइज गरेर दसैं मान्ने पुलिसको हुँदैन । सुरक्षामै कन्सर्न हुने, दशैँमा ठूला घटना नघटुन भन्ने नै फस्ट प्राइरियोटी हो । आम पब्लिकले ढुक्कसँग मनाउन पाउने वातावरण बनाउन सकियो भने मेरो लागि, सिंगो संगठनका लागि दसैं त्यहीँ हो ।

उत्तमराज सुवेदी, प्रहरी नायव महानिरीक्षक (डीआईजी), महानगरीय प्रहरी कार्यालय रानीपोखरी

दसैंमा सपरिवार बस्ने रहर नलाग्ने त होइन । जागिर खाँदा जनयुद्ध सुरु भयो । समस्याग्रस्त क्षेत्रमा पोस्टिङ भयो । छुट्टि पाउने र माग्ने अवस्था थिएन । परिवार बोलाउन पनि समस्याग्रस्त क्षेत्रमा सम्भव थिएन । चाडपर्वमा सँगै नहुने अवस्था सिर्जना भयो । पछि ह्याविट हुँदै गयो । सबै कुराले परिवारलाई खुसी राख्न सकिने रहेछ । तर, जब जब घुम्न जाने कुरा आउँछ, घरपरिवारसँगै बस्ने भन्ने कुरा आउँदा उपस्थित भएन भन्ने असन्तुष्टि परिवारमा हुन्छ ।

तर, सामान्य अवस्था हुँदा परिवार बोलाएर कार्यक्षेत्रमै मनाउने त कहिले काठमाडौंमै पोस्टिङ हुँदा घर आउने जाने अवस्थामा टीका लगाउन पाउँथे । यो मेरोमात्र होइन सबै प्रहरीको कथा हो । प्रहरीमा जागिर खाइसकेपछि घरपायक अथवा घरमा बसेर जागिर खाने सम्भावना धेरै कम रहन्छ ।

प्रहरी भइसकेपछि सँगै बस्न पाइँदैन र सबै प्रहरीका परिवारको यो गुनासो रहन्छ । तर, अब उहाँहरुले पनि बुझ्नुहुन्छ । प्रहरीको जागिर, जनताको सेवा गर्नुपर्छ, अरु जागिरजस्तो टेन टु फाइभ हुँदैन । जति बेलुका, राति भयो त्यति नै अपराधका घटना बढ्न सक्ने जोखिम हुन्छ । झन राति चनाखो भएर बस्नुपर्छ । हामीलाई धेरैले यसपटकको दसैं तिहार कस्तो भयो सोध्नुहुन्छ, मैले के भन्ने गरेको छु भने यदि त्यो चाडपर्वको बेलामा कुनै पनि अप्रिय घटना घट्न नपाई शान्तिपूर्वक सर्वसाधारणले हर्षउल्लासपूर्वक मान्ने वातावरण सिर्जना गर्न सकिएको छ भने त्यो वर्षको दसैं सफल, राम्रो र रमाइलो भयो ।

तर, नचाहँदा पनि कहिलेकाही अप्रिय घटना घट्यो र एउटा परिवारमात्रै शोकमा, समाज शोकमय भयो भने त्यसको असरले हाम्रो दसैं राम्रो भएन, खल्लो भयो भनेर भन्ने गरेको छु । व्यवहारमा त्यहीँ हो । जसरी अरुबेला सर्वसाधारण प्रहरी हाम्रो सुरक्षामा छ, गस्ती गरिरहेको छ भनेर रातभर ढुक्कले सुत्नुहुन्छ, त्यसैगरी चाडपर्वमा फेस्टी मुडमा आफन्तजनकहाँ ओहोरदोहोर गर्ने, आशिर्वाद लिने, भेटघाट गर्ने, चाडपर्व मनाउने वातावरण कुनै चिन्ताबिना ढुक्कसँग भयो भने र कुनै घटना घट्न पाएन भने हामीलाई एकदम सन्तुष्टि हुन्छ । यसपटकको चाडपर्वको बेलामा म महानगरीय प्रहरी कार्यालय रानीपोखरी काठमाडौंमै छु । मेरो परिवारहरु पनि यतै छन् । म अहिले फ्रन्टलाइनमा नभएर सुपरभाइजरी रोलमा छु । यसअघि म फ्रन्टलाइनमा थिए । त्योबेला भन्दा अलिकति केही समय निकाल्न सकिन्छ कि भन्ने खालको छ । तर, विदामा बसिँदैन । टीकाको दिन कुनै समय मिलाएर घरमा एकछिन टीका लगाउन जानेसम्मको योजना बनाएको छु । सर्वसाधारणलाई चाडपर्व मनाउने क्रममा खटिएका प्रहरी अधिकृत तथा जवानहरुको परिचालनलाई थप व्यवस्थित बनाउने, थप सुरक्षा प्रत्याभूति हुने किसिमको वातावरण सिर्जना गर्नेतर्फ आफूलाई केन्द्रीत गरेको छु । त्यसैगरी ब्यारेकभित्र पनि सिनियर र जुनियर प्रहरी अधिकृत तथा जवानहरुसँग मनाउने योजना छ । प्रहरी प्रधान कार्यालयमा आईजी साप, एआईजीलगायत अग्रजसँग आशिर्वाद लिन्छु भने इच्छुक अनुज प्रहरी कर्मचारीलाई मैले पनि टीका लगाइदिने र आशिर्वाद दिन्छु ।

अशोक सिंह, प्रहरी वरिष्ठ उपरीक्षक (एसएसपी), महानगरीय प्रहरी परिसर काठमाडौं

हामीलाई दसैंमा विदा हुँदैन । सम्पूर्ण जनशक्ति जनताको जिउधनको सुरक्षा र अपराध रोकथाम नियन्त्रणमा खटिरहेको छ । दसैंतिहार विशेष सुरक्षा योजना लागु गरेका छौं । काठमाडौंको पचासौं लाख जनसंख्याको सुरक्षा, चाडपर्व मनाउन बाहिर जाने र अन्य यहाँको सम्पूर्ण सुरक्षा व्यवस्था मिलाउनुपर्ने भएकाले प्रहरी प्रधान कार्यालयबाटै विदा नछोड्ने भन्ने निर्देशन आएको हुनाले हामी आफ्नो ड्युटी गर्ने, ड्युटी गर्दै रमाउने र मनाउने गरेका छौं । दसैंको बेला संगठन प्रमुखसँग टीका ग्रहण गर्न जान्छौं । मातहतमा रहेका वृत्त प्रमुखहरुसँग पनि टीका आदान प्रदान हुन्छ । म दसैंमा घर ९धनगढी० जान नपाएको १५ वर्ष भयो । तर बीच बीचमा बुवालाई काठमाडौं ९भैंसेपाटी० बोलाएर पनि टीका ग्रहण गरेको छु । बुवा ८४ वर्ष पुग्नुभयो । आमा पनि वृद्ध हुनुहुन्छ । म काठमाडौंजस्तो संवेदनशील ठाउँको इन्चार्जको जिम्मेवारीमा छु । आमाबुवालाई एकदमै मिस गरिन्छ । घरबाट पनि गुनासो हुन्छ । तर, चाडपर्वको बेला आफूले निर्वाह गर्नुपर्ने व्यवसायिक जिम्मेवारी छ । पहिलो प्राथमिकता हाम्रो जिम्मेवारी र कर्तव्य पालना हो । त्यसमा फोकस भएर यहीँ रमाएर दसैं मनाउने भन्ने छ । घरपरिवारलाई पनि कन्भिन्स गर्छौं । उहाँहरू पनि बुझ्नुहुन्छ । साथै प्रहरी कर्मचारीलाई पनि मोटिभ गर्नुपर्ने हुन्छ । मन खल्लो नहोस् भनेर ब्यारेकै मनाउँछौं । मासुभात खाने, अनि ड्युटी गर्ने हुन्छ । ड्युटीलाई प्रभाव नपर्नेगरी पालैपालो रोटेसनमा टीका लगाइदिने हुन्छ । हामी दसैं पनि मनाउँछौं, ड्युटी पनि गर्छौं । नागरिकले ढुक्कसँग दसैं मनाउन पाएभने हामीलाई सन्तोष हुन्छ ।

दानबहादुर कार्की, (एसपी) प्रमुख कपिलवस्तु प्रहरी

कपिलवस्तुमा हिन्दु धर्मावलम्बीले दुर्गा मूर्ति स्थापना गर्ने र दसैंको टीकाकै दिन बिसर्जन गर्ने कार्यक्रम हुँदै आएको छ । बिसर्जन गर्ने क्रममा डिजे बजाउने, उफ्रिने र खासगरी कृष्णनगरमा झडप भएर मान्छे मृत्यु हुनेसम्मको घटना हुँदै आएको छ । त्यसकारण टीकाको दिन टीका लाउनेभन्दा पनि कर्तव्यबोधको दायित्वले त्यहाँ चनाखो भएर ड्युटीमा खटिनुपर्ने अवस्था छ । म आफू विदामा जान्न । अन्य टोलीलाई पनि मूर्ति बिसर्जन कार्यलाई शान्तिपूर्ण र हिन्दु मुस्लिमका बीचमा सौहार्दपूर्ण वातावरणमा सम्पन्न गरेपछि मात्रै विदामा जाउला भनेर स्टाण्डबाई राखिएको छ ।

दसैं मनाउने कुरामा अरु ठाउँमा जस्तै अष्टमी, नवमीमा मौलो पूजा गर्ने, सबै प्रहरी कर्मचारीसँग सँगै बसेर खाना खाने हुन्छ । टीकाको दिनमा मेरो घरपरिवार नै प्रहरी कार्यालय भएकाले इच्छुक प्रहरीहरु टीका लाउन पनि आउँछन् । तर यसपालि त्यो हुँदैन । सम्पूर्ण प्रहरी कर्मचारी दुर्गा बिसर्जन कार्यक्रममा अझ सक्रियताका साथ खट्नुपर्नेछ । कपिलवस्तुमा दुर्गामूर्ति सेलाउने नै त्यस दिन पर्ने हुनाले अलि नमिल्ने स्थिति छ । मैले आमाको हातबाट टीका नलगाएको ५ वर्ष भयो । यसपालि पनि टीका लाउन आएन, बाँचिन्छ कि मरिन्छ के हो, भेट पनि भएन भन्ने गुनासो आमाबाट आउँछ । तर, एउटा बुझाई के छ भने छोरोको जागिर नै यस्तो छ, सेवा गर्ने हो, यो आउन्न, हामी पनि घर छोडेर हिँड्न पाउँदैनौं, अरु बच्चा पनि हुन्छन् त्यसले पनि लाउन पाउँदैन भनेर आमाले पिर गरेर रुनुहुन्छ । अब यसो फकाउनुपर्छ । यसो हुँदा खल्लो त लाग्छ । तर आफू शान्ति सुरक्षा कायम गर्ने दायित्वमा बसेको भएर व्यक्तिगत चिन्ता भन्दा पनि हामीले निर्वाह गर्नुपर्ने भूमिकाप्रति बढी ध्यान दिनुपर्ने भएकाले केही खल्लो भए पनि अब बानी परिसक्यो, स्वभाविक भइसक्यो ।

भरत श्रेष्ठ, प्रहरी नायव उपरीक्षक, अनामनगर वृत्त

दसैंको बेलामा झन् धेरै ड्युटी हुन्छ । मान्छे धेरै चाहिन्छ । तर त्यो भनेर दसैं नै नमनाउन नदिने, चाडबाड नमनाउने भन्ने हुँदैन । मिलाएर हामी ड्युटीमा असर नहुनेगरी कार्यालय प्रमुखबाट दसैं मनाउने र खानपिन गर्ने, टीका जमरा लगाउनेलगायतका सम्पूर्ण कार्यहरु हुन्छन् । जमरा राखेका छौं । यहाँ कार्यरत जति छौं त्यहीँ नै परिवारको हिसाबले ज्येष्ठ सदस्यबाट टीका जमरा लगाइदिने, भोज खाने, सामान्य नाचगान पनि हुन्छ । सकेसम्म ड्युटीलाई असर नपर्ने गरी विदा पनि छोडिएको छ ।

यहाँ भएकालाई घरको अभाव हुन नदिनेगरी यतै परिवार मान्नेगरी दसैंको तयारी गरेका छौं । त्यो हिसाबले मनाउँछौं । म घरमा टीका लाउन नपाएको तीन वर्ष भयो । सुरु सुरुमा विदा नपाउँदा अफ्ठेरो लाग्थ्यो । अब बानी परिसक्यो । घरमा पनि अब यो आउँदैन भन्ने हुन्छ । तँ आउन पाइँदैन भनेर अभिभावकको मानसिकता बनिसक्छ ।

प्रतिक्रिया दिनुहोस !

%d bloggers like this: