काठमाडौं उपत्यकाका तीनै जिल्ला प्रशासनले मंगलबारदेखि निषेधाज्ञालाई खुकुलो पार्दै आर्थिक गतिविधि चलाएमान बनाउने भएसँगै राइड सेयरिङ कम्पनीहरु पनि सञ्चालनमा आउने भएका छन ।आइतबार तीनै जिल्लाको सिडिओहरुको बैठकले जोर÷बिजोर प्रणालीमा निजी सवारी सञ्चालन गर्न दिने भएपछि भोलिदेखि टुटल, पठाओ लगाएतका कम्पनीले सेवा सुरु गर्ने भएका हुँन ।
राइड सेयरिङ् कम्पनी जस्तै गत हप्तादेखि काठमाडौं उपत्यकामा होम डेलिभरी सेवापनि सञ्चालन भइरहेका छन् ।
अर्कोतर्फ आइतबारको निर्णय अनुसार काठमाडौंमा बढीमा तीन जना राखेर ट्याक्सी पनि सञ्चालन गर्न पाउने भएका छन् ।
राइड सेयरिङ कम्पनी पठाओका कन्ट्री डाइरेक्टर आसिममान सिंह बस्न्यातले मंगलबारदेखि आंशिक सेवा सञ्चालन हुने जानकारी दिए ।
‘प्रशासनले ट्याक्सीलाई सञ्चालन अनुमति दिने तर, राइड सेयरिङ कम्पनीलाई रोक्ने हुन सक्दैन’ बस्न्यातले भने ‘ ट्याक्सी भन्दा सुरक्षित तबरबाट सेवा दिन्छौं’ ।
सरकारले तत्कालै काठमाडौं उपत्यकामा सार्वजनिक यातायात समेत सञ्चालन अनुमति दिइसकेको छैन । जसको कारण यस्तो सेवाले यात्रुलाई राहत दिने बताइएको छ ।
उनका अनुसार सार्वजनिक यातायातको विकल्पमा यात्रुहरुलाई आवतजावत गर्न राइड सेयरिङ कम्पनी नै प्रभावकारी हुने बस्न्यातको भनाई छ ।
सार्वजनिक यातायात सञ्चालन नभएको अवस्थामा ट्याक्सी मार्फत यात्रु यात्रा गर्ने अवस्था नरहेका कारण पनि उपत्यकामा टुटल पठाओ सञ्चालन गनुैपर्ने व्यवसायीहरुले बताएका छन् ।
टुटलका संस्थापक शिक्षित भट्टले भोलिदेखि टुटलको सबै सेवा पूर्णरुपमा सुचारु हुने बताए ।
‘जिल्ला प्रशासनले राइड सेयर कम्पनी नै तोकेर सञ्चालन अनुमति नदिएपनि हामी सेवा सुरु गर्न लागेको हौं’ उनले भने ‘प्रशासनले रोक लगाउनपनि सक्छ त्यो सञ्चालन भएपछि मात्रै थाहा हुन्छ’ । गत बर्ष निषेधाज्ञा खुलेपनि यस्ता कम्पनी सञ्चालन भएका थिएनन् ।
सार्वजनिक यातायात नचलेको अवस्थामा यात्रुलाई यो सेवाले राहत दिने व्यवसायीको भनाई छ । भट्टका अनुसार मंगलबारदेखि राइडरहरुलाई स्वास्थ्य मापदण्ड पालना गराएर यात्रुको ओसारपसार गर्ने छ ।
कम्पनीहरुले राइडरहरुलाई सेवा सुरु हुने भन्दै तयारी गर्न म्यासेज समेत पठाइसकेका छन् ।
काठमाडौं जिल्ला प्रशासन कार्यालयले एक हप्ताका लागी उपत्यकामा सार्वजनिक यातायात तथा अन्य भिडभाड हुँने क्षेत्रलाई केहिम समय रोक लगाइने जनाएको छ ।
