११ जेष्ठ २०८१, शुक्रबार
 |   Fri May 24 2024
Logo

विज्ञापन रद्द, तर आवेदकबाट संकलित करिब डेढ करोड फिर्ता भएन



जयनगर–जनकपुर–कुर्था रेल सेवा सञ्चालन गर्न करारमा कर्मचारी नियुक्तिका लागि आह्वान गरिएको विज्ञापन रद्द भए पनि आवेदकको रकम भने फिर्ता भएको छैन ।

नेपाल रेल्वे कम्पनीले स्टेसन मास्टर, टिटी, क्यासियर, गार्ड, प्रशासन, लेखालगायतका २९ वटा पदमा १२९ जना करार कर्मचारी भर्ना गर्नका लागि दरखास्त आह्वान गरेको थियो । पछि सो विज्ञापन रद्द गरिएको थियो ।

रद्द भएको विज्ञापनका लागि निवेदकहरूबाट करिब डेढ करोड रुपियाँ सङ्कलन भएको थियो ।

दरखास्त आह्वान गरिएको अन्तिम दिनसम्म ३२ हजार ६८६ जनाले आवेदन दिएका थिए । दरखास्त दिने अन्तिम म्याद असोज १२ गतेसम्म थियो गत वर्ष भदौ २९ गते दरखास्त आह्वान गरिएको थियो ।

अधिकृत स्तर पदका लागि एक हजार, सुब्बा स्तरको चार सय र श्रेणीविहीन स्तरको विज्ञापनका लागि तीन सय रुपियाँ आवेदन दस्तुर तोकिएको थियो ।

दस्तुरबापत करिब एक करोड ३६ लाख रुपियाँभन्दा बढी रकम नेपाल रेल्वे कम्पनीको खातामा जम्मा भएको थियो ।

नेपाल रेल्वे कम्पनी लिमिटेडका महाप्रबन्धक गुरु भट्टराईले करारमा कर्मचारी भर्नाको लागि आह्वान गरिएको विज्ञापन रद्द भए पनि आवेदकहरूले आवेदनबापत लागेको शुल्क फिर्ता पाउने बताए ।

मन्त्रिपरिषद्को निर्णयअनुसार सो आवेदन आह्वान गरिए पनि लोकसेवा आयोगको निर्देशनमा विज्ञापन रद्द गर्नुपरेको उनले बताए ।

उनले भने, ‘आवेदकहरूको रकम फिर्ताका लागि सम्बन्धित बैङ्कसँग समन्वय भइरहेको छ । कुन प्रक्रियाबाट रकम फिर्ता गर्न सकिन्छ भन्ने विषयमा टुङ्गो लागेपछि रकम फिर्ता लिन आउन सार्वजनिक सूचना जारी गरिने छ ।’

आवेदक एभरेस्ट बैङ्क लिमिटेडमार्फत आवेदन शुल्क दाखिला गरेका थिए । आवेदकहरूले सक्कल भौचर लिएर रकम फिर्ता लिन आउनुपर्ने उनले स्पष्ट पारे । आजको गोरखापत्र दैनिकमा खबर छ ।


प्रतिक्रिया दिनुहोस !