१६ चैत्र २०८०, शुक्रबार
 |   Fri Mar 29 2024
Logo

‘२४ घण्टामै ट्रान्सक्रिप्ट’ को नारा लगाएको त्रिविले प्रमाणपत्र दिन लगाउँछ २० दिन



काठमाडौं । त्रिभुवन विश्वविद्यालयले २०७५ सालमा विद्यार्थीले लब्धाङ्कपत्र (ट्रान्सक्रिप्ट) लिन पाइरहेको सास्तीको अन्त्य गर्दै आवेदन दिएको २४ घण्टामै उपलब्ध गराउने भनेर घोषणा गर्‍यो । त्रिवि परीक्षा नियन्त्रण कार्यालयले एक कार्यक्रम आयोजना गरी २०७५ जेठ १३ गतेदेखि ‘परीक्षा व्यवस्थापन सूचना प्रविधि प्रणाली’ सुरु गरेको थियो । तत्कालीन उपकुलपति प्राडा तीर्थराज खनियाँले सो प्रणालीको उद्घाटन गर्दै त्रिवि अब सूचना प्रविधिमैत्री भएको बताएका थिए ।

‘हामी त्रिविलाई कागजविहीन बनाउने प्रयासमा छौं । यसैको सुरुवात आजदेखि एकै दिनमा ट्रान्सक्रिप्ट दिन थालेका हौं । एकै दिनमा ट्रान्सक्रिप्ट दिने सेवालाई विस्तारै क्षेत्रीय कार्यालय र क्याम्पसमा विस्तार गर्नेछौं,’ उनले भनेका थिए । उनले सन् २०२० सम्म अनलाइन प्रणालीलाई व्यवस्थित बनाई परीक्षा सुधार गरिने बताएका थिए ।

परीक्षा नियन्त्रक पुष्पराज जोशीले विद्यार्थीलाई ट्रान्सक्रिप्ट पाउन हप्ता लाग्ने भएकामा अब सजिलोका लागि फाराम भरेकै दिन पाउने बताएका थिए । त्यसका लागि नयाँ प्रविधि प्रयोग गरेर एक मिनेटमा ४५ वटा ट्रान्सक्रिप्ट छाप्ने बताइएको थियो । सोही प्रणालीमार्फत त्रिविले रजिष्ट्रेशन, परीक्षा फारम, नतिजा प्रकाशन, लब्धाङ्क र प्रोभिजनल सर्टिफिकेट समेत वितरण गर्दै आएको छ ।

पनिकाले त्यो बेला केन्द्रीय कार्यालयबाट सुरु गरेको उक्त कार्य विस्तारै पोखरा, नेपालगञ्ज, विराटनगर र अत्तरियाबाट समेत एकै दिनमा ट्रान्सक्रिप्ट दिने योजना बनाएको थियो । तर, त्यो योजना केही दिनको तडकभडक मात्र बन्न पुग्यो । त्रिवि अहिले पुरानै पारामा फर्किएको छ । २४ घण्टा होइन, अचेल २४ दिनमा पनि प्रमाणपत्र दिन नसक्ने अवस्था छ । आवेदन दिएको सात दिनभित्रमा प्रमाणपत्र उपलब्ध गराउने भनिए पनि सात दिनमै प्रमाणपत्र पाएको कोही पनि भेटिएका छैनन् । त्यसका लागि आवेदन दिएको कम्तीमा १० दिन त लागेकै छ ।

हाल दैनिक एक हजार ५०० भन्दा बढी विद्यार्थी ट्रान्सक्रिप्ट लिन पनिका बल्खु पुग्छन् । विद्यार्थीहरूले २० दिनमा पनि प्रमाणपत्र नपाएको गुनासो गर्दै आएका छन् । उनीहरूले त्रिविको नारा र व्यवहार फरक खालको भएको बताउने गरेका छन् ।

बझाङबाट स्नातक तहको प्रमाणपत्र लिन त्रिवि पुगेका प्रकाश सिंहले १८ दिनमा पनि नपाएको बताए । २०७० सालमा स्नातक तह उत्तीर्ण गरेका उनी मंसिरमा प्रमाणपत्र लिन काठमाडौं आएका थिए । प्रमाणपत्रका लागि आवेदन दिएको २० दिनपछि उनले प्रमाणपत्र पाएको बताए ।


प्रतिक्रिया दिनुहोस !