२२ मंसिर २०७८, बुधबार
 |   Wed Dec 8 2021
Logo

सहभागीहरु थपिदै नागरिक पेन्सन योजनामा



काठमाडौँ । नागरिक लगानी कोषले सर्वसाधारणलाई पनि पेन्सन उपलब्ध गराउने गरी ल्याएको नागरिक पेन्सन योजनामा सहभागी हुन चाहने बढिरहेका छन् । कोषले यस्तो योजना ल्याएपछि हालसम्म तीन हजारभन्दा बढीले चासो देखाएर कार्ड लिइसकेका छन् ।

कोषका प्रवक्ता उद्धव सिलवालका अनुसार कोषले सर्वसाधारण जनतालाई बचत गर्न प्रोत्साहित गर्ने, त्यस्तो बचतलाई देशको आर्थिक विकासमा परिचालन गर्ने र सक्रिय जीवनकालमा जम्मा गरेको रकमबाट बचतकर्ताको जीवनयापनलाई सहजीकरण गर्ने उद्देश्यले यस्तो योजना ल्याएको हो ।

कोषमा सहभागी हुन चाहने बचतकर्ताको सहजताका लागि कोषले एनआईसी एसिया बैङ्कसँग सहकार्य गर्ने समझदारी पनि गरिसकेको छ । समझदारी पत्रमा बैङ्कका प्रमुख कार्यकारी अधिकृत रोशनकुमार न्यौपाने तथा कोषका कार्यकारी निर्देशक रमण नेपालले हस्ताक्षर गर्नुभयो ।

त्यसअनुसार बैङ्कले कोषका लागि छुट्ट भौचरको पनि व्यवस्था गरिसकेकाले बचतकर्ताले बैङ्कमै किस्ता रकम जम्मा गर्नसक्ने निर्देशक नेपालले जानकारी दिनुभयो । साथै बैङ्कले निकट भविष्यमा नै विद्युतीय भुक्तानी सेवामार्फत पनि अनलाइनमार्फत किस्ता रकम भुक्तानी गर्न मिल्ने तयारी गरिरहेको कोषले जनाएको छ ।

सहभागी को हुन सक्छन् ?

यस योजनामा कानुनबमोजिम स्थापना भएका सङ्घसंस्था एवं प्रतिष्ठानमा कार्यरत श्रमिक÷कर्मचारी, स्वरोजगारमा रहेका सर्वसाधारण र गैरआवासीय तथा वैदेशिक रोजगारीमा रहेका नेपाली नागरिक सहभागी हुनसक्ने कोषले जनाएको छ ।

कोषमा बचतकर्ताले न्यूनतम मासिक पाँच सय रुपियाँदेखि अधिकतम आम्दानीको क्षमताअनुसार १० ले भाग जाने अङ्कको रकम मासिक÷त्रैमासिक÷अर्धवार्षिक÷वार्षिक रूपमा बुझाउनसक्ने छन् ।

कोषमा सहभागी भइसकेपछि आफूले छनोट गरेअनुसारको रकम नियमित रूपमा बुझाउनुपर्ने छ । तोकिएको समयमा बुझाउन नसकेकमा विलम्ब शुल्क तिरेर किस्ता नियमित गर्न सकिने कोषले जनाएको छ ।

कुनै अवस्थामा बचतकर्ताका आयस्रोत गुमेमा वा अशक्त भई आयआर्जन हुन नसकेमा, बसाइँ सरी विदेशिने अवस्था भएर योजनाबाट अलग पनि हुन चाहेमा कोषमा जम्मा भएको रकमको सावाँ ब्याज एकमुष्ट प्राप्त गर्नसक्ने छन् तर यसका लागि नियमित बचत भएको कम्तीमा दुई वर्ष पूरा भएको हुनुपर्ने कोषले जनाएको छ ।

कोषमा जम्मा गरेको रकमबाट पेन्सन पाउनका लागि भने कम्तीमा १५ वर्षसम्म आफूले छनोट गरेको रकम जम्मा गरेको हुनुपर्ने छ । बचतकर्ता ६० वर्ष उमेर पुगेपछि पेन्सन उपलब्ध हुन्छ तर कोही व्यक्तिले बचत गर्न थालेपछि १५ वर्षअगावै निजको उमेर ६० वर्ष पुग्ने रहेछ भने निजले कोषमा जम्मा गरेको रकम र ब्याज र प्रतिफल एकमुष्ट भुक्तानी लिनसक्ने छन् ।

कति पाइन्छ पेन्सन ?

सहभागीले गरेको बचत, त्यसको ब्याज र कोषको लगानीबाट प्राप्त प्रतिफलसमेत जोडेर हुन आउने कुल रकमलाई १७० ले भाग गर्दा आउने रकम प्रत्येक महिना पेन्सनका रूपमा जीवनभर पाउन सकिन्छ ।

यस्तै सहभागीले पेन्सन प्राप्त गर्न सुरु गरेपछि निजको मृत्यु भएमा मृतकका पति वा पत्नीलाई निजले पाइरहेको रकम वराबर नै पारिवारिक पेन्सन प्रदान गरिने छ । यस योजनमा नेपाल सरकार वा अन्यत्रबाट पेन्सन पाइरहेका व्यक्ति पनि सहभागी हुनसक्ने जनाइएको छ ।- गोरखापत्र अनलाइन


प्रतिक्रिया दिनुहोस !


कुटपिट गरी हत्या गरेको आरोपमा तीनजना पक्राउ



काठमाडौँ : प्रहरीले कुटपिट गरी हत्या गरेको आरोपमा तीनजनालाई पक्राउ गरेको छ ।

चन्द्रपुर नगरपालिका(१ मंगलपुर बस्ने २८ वर्षीय गोपाल थिङको कुटपिट गरी हत्या गरेको अभियोगमा तीनजनालाई मंगलबार बिहान पक्राउ गरेको हो ।

पक्राउ पर्नेहरूमा उनकै दाइ ३५ वर्षीय रविन्द्र थिङ, माईजु नाता पर्ने ४२ वर्षीया दुधिमाया पाख्रिन र काठमाडौं घर भएका मामा नाता पर्ने ३९ वर्षीय आषिश पाख्रिन रहेका छन् ।

मंगलपुरमा कुटपिटबाट मानिसको मृत्यु भएको भन्ने खबर प्राप्त हुनासाथ ईलाका प्रहरी कार्यालय चपुर र प्रहरी चौकी पौराहीबाट खटिएको प्रहरीले उनीहरूलाई पक्राउ गरेको हो । पक्राउ परेका उनीहरुमाथि थप अनुसन्धान भइरहेको प्रहरीले जनाएको छ ।

प्रतिक्रिया दिनुहोस !

गन्ने नै हो भने ओलीले एमालेबाट खोसेको सम्पत्ती अरब बढी नै होला : माधव नेपाल



काठमाडौं । नेकपा एमालेको सम्पत्ती केपी शर्मा ओलीले खोसेर लगेको नेकपा एकीकृत समाजवादीका अध्यक्ष माधवकुमार नेपालले बताएका छन् ।

इटहरीमा पार्टी कार्यालय निरीक्षणका लागि पुगेका उनले एमालेको भौतिक र नगद सम्पत्ती ओली समूहले खोसेर लगेको बताएका हुन् । ‘जोड्दै जाने हो भने कति अरब पुग्ने हो भौतिक सम्पती, नगदहरु पनि छन्,’ उनले भने, ‘यी सबै खोसेर लगेका छन् उनीहरुले, कब्जा गरेका छन् तर पनि केही बात छैन फेरि आर्जन गरौंला ।’ उनले हक लाग्ने भए हक खोज्ने बताए । हक खोज्नका लागि कानूनी बाटो अपनाउने उनले बताए ।

‘हक लाग्छ भने त्यसका निम्ति कानूनी उपायहरु खोजौंला,’ उनले भने,‘ पार्टीलाई व्यवस्थीत बनाउन कार्यालय अपरिहार्य छ ।’

प्रतिक्रिया दिनुहोस !

केपी ओलीको घमण्डले सबैथोक बर्बाद भयो : मन्त्री खतिवडा



काठमाडौं । स्वास्थ्य तथा जनसंख्या मन्त्री बिरोध खतिवडाले एमाले अध्यक्ष तथा पूर्वप्रधानमन्त्री केपी शर्मा ओलीमा रहेको घमण्डले मुलुक सन्त्रासमा गएको बताउनुभएको छ ।

नुवाकोटस्थित त्रिशुली अस्पतालको नवनिर्मित भवन उद्घाटन तथा हस्तान्तरण कार्यक्रमपछि सदरमुकाम बिदुरमा समाजवादी प्रेस संगठनले आयोजना गरेको पत्रकार सम्मेलनमा बोल्दै उहाँले उक्त कुरा उल्लेख गर्नुुभएको हो ।

आफू मात्रै सर्वेसर्वा भन्ने ओलीको घमण्डले मुलक पछाडि परेको उहाँको भनाइ छ । दुई तिहाईको बहुमतीय सरकारलाई धान्न नसकेर अहिले प्रतिपक्षमा बस्नु परेको बताउदै ओलीकै घमण्डका कारण आफूहरु नयाँ पार्टी गठन गर्न बाध्य भएको मन्त्री खतिवडाले बताउनुभयो ।

उहाँले पार्टी र सत्ता सञ्चालनमा विचार र सिद्घान्तलाई पञ्छाउँदै व्यक्तिगत स्वार्थका योजनाहरुलाई समावेश गरेको उपजका कारण एमाले अहिले प्रतिपक्षमा पुगेको दाबी गर्नुभयो ।

अर्को प्रसंगमा मन्त्री खतिवडाले अब कोरोना संक्रमणकै कारण मुलुकमा लकडाउन नहुने बताउनुभयो । विगतमा संक्रमण नियन्त्रण तथा रोकथामका लागि भएका निषेधाज्ञाले संक्रमणलेभन्दा धेरै भोकमरीको समस्या सिर्जना भएको उहाँले उल्लेख गर्नुभयो । उहाँले भन्नुभयो, ‘अहिलेकै अवस्थामा लकडाउन हुँदैन, संक्रमण नियन्त्रण तथा रोकथामका लागी थप योजनाहरु ल्याइन्छ ।’

त्यसअवसरमा उहाँले नेपाली नागरिकलाई आवश्यक पर्ने सबै खोप नेपालले स्टोर गरिसकेको उल्लेख गर्दै उहाँले पुस महिनाभित्रमा सबै नागरिकले खोप लगाइसक्ने बताउनुभयो । उहाँले खोप सुनिश्चितताको लागि अभियाननै सञ्चालन गर्ने तयारी रहेको जानकारी दिनुभएको छ ।

एकीकृत समाजवादीको पत्रकार सम्मेलनमा समाजवादी पार्टीका बागमती प्रदेश सदस्य यमकुमार खाती, पार्टीका जिल्ला अध्यक्ष गोविन्द नेपाली, उपाध्यक्ष शान्ता थापा, उपसचिव उद्वव पनेरु, वुद्धिजिवी विभाग प्रमुख रामहरी गजुरेल, युवासंघ तथा विद्यार्थी नेता र कार्यकर्ताहरुको बाक्लो उपस्थिति थियो ।

प्रतिक्रिया दिनुहोस !

%d bloggers like this: