पर्यटकीय नगरी पोखरामा छैन पर्यटन वर्षको रौनक « Name of Truth News : News Portal in Nepal
   ४ कार्तिक २०७८, बिहीबार
 |   Thu Oct 21 2021
Logo

पर्यटकीय नगरी पोखरामा छैन पर्यटन वर्षको रौनक



पोखरा । पर्यटकीय राजधानी पोखरामा यस वर्ष पर्यटन दिवसको रौनक छैन । हरेक वर्ष सेप्टेम्बर २७ को पूर्वसन्ध्यामा पर्यटक लक्षित विभिन्न कार्यक्रमको तयारीमा जुट्ने यहाँका पर्यटनसम्वद्ध सङ्घसंस्थाले यस वर्ष भने कोभिड–१९ कारण पर्यटन केन्द्रित कार्यक्रमको आयोजना गरेका छैनन् ।

हरेक वर्ष सेप्टेम्बर २७ मा बाजागाजा, झाँकीसहित पोखरा विमानस्थल र पर्यटक बसपार्कमा पर्यटकलाई ढाकाटोपी र दोसल्लासहित भव्य स्वागत गरेर कार्यक्रम गर्दै आएकामा यस वर्ष कुनै पनि कार्यक्रम नगरेको पोखरा पर्यटन परिषद्का अध्यक्ष चिरञ्जीवी पोखरेलले जानकारी दिनुभयो । उहाँले भन्नुभयो, “हामीले यस वर्ष पर्यटक लक्षित कार्यक्रम राखेनौँ, कोभिड–१९ ले आन्तरिक तथा बाह्य पर्यटकको आगमन शून्य छ, भीडभाडमा कोरोनाको जोखिम पनि उच्च रहने भएकाले यस वर्ष औपचारिक कार्यक्रम नगर्ने निर्णयमा पुगेका हौँ ।” उहाँले पर्यटन क्षेत्र चलायमान र भावी रणनीतिका विषयमा व्यवसायीबीच भर्चुअल अन्तरक्रिया गरिने जानकारी दिनुभयो ।

ट्रेकिङ एजेन्सिज एशोसिएशन अफ नेपाल टान पश्चिमाञ्चलले भने ग्रामीण पर्यटन प्रवर्धनले जोड दिएर विश्व पर्यटन दिवस मनाउँदै आएकामा यस वर्ष फेवाताल पारी एक कार्यक्रमको आयोजना गरेर मनाउन लागेको टानका अध्यक्ष हरि भुजेलले जानकारी दिनुभयो । उहाँले भन्नुभयो, “सेप्टेम्बर २७ ग्रामीण पर्यटनलाई जोड दिएर ग्रामीण भेगमा नै पुगेर भव्यरूपमा कार्यक्रम गर्दै आएका थियौँ, तर अहिले कोभिड–१९ का कारण गाउँकेन्द्रित कार्यक्रम गर्न असमर्थ भयाँै । यस वर्ष प्रदेशका मुख्यमन्त्री पृथ्वी सुब्बा गुरुङको प्रमुख आतिथ्यमा फेवातालपारि किनारमा ‘फेवा फुट ट्रेल–वस्तुगत अध्ययन’ साथै कोभिडपछिको पर्यटन विषयलाई केन्द्रित गरेर कार्यक्रम तय गरेका छाँै ।”

उहाँले फेवाताल पर्यटकको प्रमुख गन्तव्य स्थलकारुपमा रहे पनि आवश्यक पूर्वाधारको अभावले थप आकर्षक बन्न नसकेको जनाउँदै प्रदेश र स्थानीय सरकारको ध्यानाकर्षणका लागि कार्यक्रम गर्न लागेको जानकारी दिनुभयो ।उहाँका अनुसार फेवातालमा प्याडल डुङ्गामार्फत तालपारि रानीवनमा रहेका चिसापानी र मेवाखोलाको झरनाको अवलोकन साथै तालछेउमा गएको पहिरोको स्थलगत अवलोकन गरेर आवश्यक संरक्षणका लागि समेत पहल गरिने बताउनुभयो ।

पर्यटन बोर्ड गण्डकी प्रदेशको सहकार्यमा आयोजित उक्त कार्यक्रममा उद्योग, पर्यटन वन तथा वातावरण मन्त्रालय गण्डकी प्रदेशका मन्त्री विकास लम्साल, पोखरा महानगरपालिका प्रमुख मानबहादुर जिसी, पर्यटनविद्, सरोकारवाला व्यक्ति, सञ्चारकर्मी सामाजिक दूरी कायम गरेर छुट्टाछट्टै डुङ्गाबाट सो स्थानमा पुगेर अवलोकन गर्ने कार्यक्रम रहेको टानका सचिव जीवनराज सापकोटाले जानकारी दिनुभयो ।

पर्यटन मन्त्रालय पोखराको २०१९ को तथ्याङ्कअनुसार पोखरामा दुई लाख ९८ हजार पर्यटक आएको अभिलेख रहेको पर्यटक संयोजक जुद्ध गुरुङले जानकारी दिनुभयो । अभिलेखमा थुप्रै पर्यटक छुटेकाले करिब चार लाख पर्यटक आएको हुनसक्ने उहाँको अनुमान छ । त्यसैगरी गण्डकी प्रदेशको पर्यटन क्षेत्रमा रु पाँच खर्ब ९३ अर्ब ९२ करोड ५६ लाख ११ हजार लगानी छ । पर्यटकको बसाइ दुईदेखि तीन दिन र खर्च सरदर पाँच हजार रहेको उहाँको भनाइ छ ।पोखरामा हाल करिब २०० देखि २५० को हाराहारीमा विदेशी पर्यटक रहेको पर्यटन व्यवसायीको अनुमान छ ।


प्रतिक्रिया दिनुहोस !


खानेपानी कार्यालय जनकपुरका प्रमुखलाई सिके राउतका कार्यकर्ताले अर्धनग्न बनाएर बजार घुमाए



खानेपानी डिभिजन कार्यालय जनकपुरका कार्यालय प्रमुख जागेश्वर कुशवाहमाथि जनमत पार्टीका (सिके राउत) कार्यकर्ताले दुव्र्यवहार गरेका छन् । कुशवाहलाई नियन्त्रणमा लिएर कार्यकर्ताहरुले अर्धनग्न बनाई बजार परिक्रममा गरेका छन् ।

सडक विस्तारका क्रममा खानेपानीको पाइप ठाउँठाउँमा फुटेको र उक्त फुटेको पाइप मर्मत गर्न आग्रह गर्दा कुशवाहले जनकपुर नगरपालिकातिर जिम्मेवारी देखाउँदै आएको आरोप छ । सोही विषयमा विवाद हुँदा सिके राउतका कार्यकर्ताले उनीमाथि दुव्र्यवहार गरेका हुन् ।

यसैबीच दुव्र्यवहार गरेको आरोपमा प्रहरीले जनमत पार्टीका कार्यकर्ता  विजयकुमार यादवसहित सात जनालाई पक्राउ गरेको छ । पक्राउ परेका कार्यकर्तालाई रिहाइको माग गर्दै जिल्ला प्रहरी कार्यालय अगाडी नरा जुलुस भइरहेको छ । 
 

प्रतिक्रिया दिनुहोस !

बाढीपहिरोले बझाङमा ९ जनाको मृत्यु, २१ जना बेपत्ता



केही दिनयता परेको अविरल वर्षाका कारण आएको बाढीपहिरोमा परी बझाङमा हालसम्म नौ जनाको मृत्यु भएको छ । २१ जना अझै बेपत्ता छन् । बेपता ब्यक्तिहरूलाइ जिवितै फेला पार्ने सम्भावना निकै कम रहेको कारण मृतकको संख्या बढ्ने अनुमान गरिएको छ । 

मंगलबार बिहान थलारा गाउँपालिका वडा नं ४ डिक्लामा गएको पहिरोमा परी गगने सार्कीका एकै घरका १८ जना र नरे पार्कीका घरका पाँच जना बेपत्ता भए । दुई दिनदेखि हराइरहेका उनीहरूमध्ये दुई जनाको शव भेटिएको छ । 

अहिले बझाङको मौसम सुधार हुँदै गएकाले खोजीकार्यमा नेपाली सेना, सशस्त्र प्रहरी र नेपाल प्रहरी घटनास्थलमा खटिएका छन् । गाउँभन्दा माथि ढोगदिना भन्ने ठाँउबाट पहिरो जाँदा दुई गाउँका १४८ घरपरिवार विस्थापित भएका छन् भने सात घर पुरिएका छन् । पहिरोका कारण तल्लो डिक्ला र माथिल्लो डिक्ला गाउँका स्थानीय त्रिभुवन मावि महेन्द्रधारमा अस्थायी रूपमा आश्रय लिइरहेका छन् ।

पूरा गाउँ पहिरोको जोखिममा रहेपछि सयभन्दा बढी परिवार विस्थापित भई आफन्त र नजिकैको विद्यालयमा बसिरहेको शान्ति मावि पाराकाट्नेका शिक्षक मदनबहादुर साउदले बताए । 

विद्यालयमा बसिरहेका विस्थापितहरूमध्ये बालबालिका र वृद्धावृद्धलाई बढी समस्या भएको छ ।  घरभन्दा माथिको डाँडाबाट पहिरो खसेर घर पुरिँदा खप्तडछान्ना गाउँपालिकाको माझीगाँउका ४५ वर्षीय भर्मराज रोकाया र उनकी ४१ वर्षीया श्रीमती जैसरा रोकाया, कालुखेतीका ४७ वर्षीय बिरु गिरी र उनकी ४५ वर्षीया श्रीमती चन्द्रा गिरी र पाटादेवलका धनराज जोशीको मृत्यु भएको हो । एक जनाको पहिचान खुलेको छैन । 

छविसपाथीभेरा गाउँपालिका २ मुम्लामा खोलाले बगाउँदा १० वर्षीय एक बालकको मृत्यु भएको छ । जयपृथ्वी नगरपालिकाको कैलासमा ६० परिवार विस्थापित भएका छन् भने थलारा गाउँपालिकाका दुई सयभन्दा बढी परिवार विस्थापित भएका छन् ।

सो क्षेत्रमा यतिबेला सञ्चारमा समेत समस्या छ । मोबाइलमा नेटवर्क नहुँदा क्षतिको पूरा विवरण आउन नसकेको प्रमुख जिल्ला अधिकारी मोहन अधिकारीले बताए ।

प्रतिक्रिया दिनुहोस !

माओवादी केन्द्रका विभाग गठन : मन्त्रालय चलाएकालाई नै सम्बन्धित विभाग



नेकपा माओवादी केन्द्रले विगतमा जसजसले मन्त्रालय चलाएका छन्, उनीहरूलाई नै सबन्धित विभागको जिम्मेवारी तोकेको छ । 

बिहीबार बसेको माओवादी केन्द्रको स्थायी समिति बैठकले अर्थ मन्त्रालय चलाएका वर्षमान पुनलाई अर्थ तथा योजना विभागको जिम्मेवारी दिइएको छ भने पराराष्ट्र मन्त्रालय चलाएका नारायणकाजी श्रेष्ठलाई विदेश मामिला विभागको जिम्मेवारी तोकेको छ । 

सञ्चार मन्त्रालय चलाएका कृष्णबहादुर महरालाई प्रचार तथा प्रकाशन विभागको जिम्मेवारी दिइएको छ भने भूमिसुधार मन्त्रालय चलाएका हरिबोल गजुरेललाई कृषि तथा भूमिसुधार विभागको जिम्मेवारी दिइएको छ ।

१. अर्थ तथा योजना विभाग – वर्षमान पुन

२. संगठन विभाग – जनार्दन शर्मा

३. विदेश मामिला विभाग – नारायणकाजी श्रेष्ठ

४. प्रचार तथा प्रकाशन विभाग – कृष्णबहादुर महरा

५. विपद् व्यवस्थापन विभाग – सूर्य सुवेदी

६. उद्योग मामिला विभाग – वामदेव क्षेत्री

७. कृषि तथा भूमिसुधार विभाग – हरिबोल गजुरेल

८. उपभोक्ता हित संरक्षण विभाग – मात्रिका यादव

९. कोष तथा आर्थिक विभाग – डोरप्रसाद उपाध्याय

१०. खानेपानी विभाग – विना मगर

११. जलस्रोत तथा ऊर्जा – लिलामणि पोखरेल

१२. निर्वाचन विभाग – खिमलाल देवकोटा

१३. कानुन विभाग – मुक्ति प्रधान

१४. पर्यटन विभाग – झक्कुप्रसाद सुवेदी

१५. प्रादेशिक मामिला विभाग – पर्शुराम तामाङ

१६. पार्टी स्कुल विभाग – गिरिराजमणि पोखरेल

१७. पुस्तकालय तथा अभिलेख – नारायणप्रसाद शर्मा

१८. भौतिक पूर्वाधार विभाग – हरि अधिकारी

१९. युवा तथा खेलकुद विभाग – गणेशमान पुन

२०. राजकीय मामिला विभाग – रेखा शर्मा

२१. राष्ट्रिय सुरक्षा विभाग – कृष्णबहादुर महरा

२२. वन तथा वातावरण – शक्ति बस्नेत

२३. विज्ञान तथा प्रविधि विभाग – गणेश साह

२४. शिक्षा तथा मानवस्रोत विभाग – मायाप्रसाद शर्मा

२५. श्रम तथा रोजगार विभाग – रामेश्वर राय यादव

२६. संघीय संसदीय विभाग – देव गुरुङ

२७. समाज कल्याण विभाग – सत्या पहाडी

२८. सहकारी तथा गरिबी विभाग – धर्मदत्त देवकोटा

२९. सहरी विकास विभाग – देवेन्द्र पौडेल

३०. सामान्य प्रशासन विभाग – टेकबहादुर बस्नेत

३१. साहित्य तथा कला विभाग – गोपाल ठाकुर

३२. स्थानीय तह विभाग – उर्मिला अर्याल

३३. स्वास्थ्य तथा जनसंख्या विभाग – कल्पना धमला

३४. नीति अध्ययन प्रतिष्ठान – रामचन्द्र झा

प्रतिक्रिया दिनुहोस !

ताजा

लोकप्रिय

%d bloggers like this: