म्याग्दीमा मात्रै आठ सय मेगावाट विधुत « Name of Truth News : News Portal in Nepal
   ६ कार्तिक २०७८, शनिबार
 |   Sat Oct 23 2021
Logo

म्याग्दीमा मात्रै आठ सय मेगावाट विधुत



बेनी । देशभर एक हजार दुई सय मेगावाट बिजुली उत्पादन भइरहेको मौजुदा अवस्थामा एकै जिल्लामा झण्डै आठ सय मेगावाटको बिजुली उत्पादनको थालनी सुखद सन्देश हो । यो सुवर्ण अवसर म्याग्दीले प्राप्त गर्दैछ ।

म्याग्दीमा अहिले ६२९ मेगावाट क्षमताको विद्युत् उत्पादनका लागि निर्माण प्रक्रिया सुरु भएको छ । त्यसअघि १५९ मेगावाट क्षमताका लागि सर्वेक्षण अनुमति प्राप्त भइसकेको छ । मौजुदा सात मेगावाटको विद्युत् उपलब्ध छ । सबै आयोजना पूरा हुँदा एक जिल्लामा ७९५ मेगावाट अर्थात् झण्डै आठ सय मेगावाट विद्युत् उत्पादन हुनेछ ।

विद्युत् विकास विभागका अनुसार म्याग्दीबाट मात्रै झण्डै आठ सय मेगावाट विद्युत् उत्पादन हुने गरी प्रक्रिया अगाडि बढिरहेको छ । निर्माणको प्रक्रिया रहेकाबाहेक विभिन्न १७ समूहले १५९ मेगावाट क्षमताको आयोजनाका लागि सर्भेको अनुमति पाएकोे विद्युत् विकास विभागका सूचना अधिकारी नीशा रिजालले जानकारी दिनुभयो ।

हालसम्म म्याग्दीको अन्नपूर्ण गाउँपालिका–४, नारच्याङमा रहेको घलेम्दी हाइड्रोले पाँच मेगावाट र तातोपानी साना जलविद्युत् आयोजनाले दुई मेगावाट विद्युत् उत्पादन गरिरहेका छन्् । नेपाल विद्युत् प्राधिकरण स्वामित्वको राहुघाट जलविद्युत् आयोजनाबाट ४० मेगावाट विद्युत् उत्पादनका लागि नौ अर्ब १६ करोड रुपियाँ लगानी हुँदैछ ।

पश्चिम म्याग्दीको दरवाङमा म्याग्दी खोला दरवाङ आयोजनाबाट २५ मेगावाट विद्युत् उत्पादनका लागि धौलागिरि कालिका हाइड्रोले पाँच अर्ब १५ करोड रुपियाँ लगानी गर्ने गरी निर्माण थालेको छ । निर्माण थालिएका १५ जलविद्युत् आयोजनामध्ये सबैभन्दा ठूलो कालीगण्डकी गर्ज १६४ मेगावाट क्षमताको रहेको छ । मुस्ताङको दामोदर कुण्डबाट बग्ने कालीगण्डकी नदीको पानी प्रयोग गरेर बन्न लागेको कालीगण्डकी गर्जले २०७५ सालमा निर्माण अनुमति पाएको हो । नीलगिरि खोलामा नीलगिरि हाइड्रोले ११० मेगावाट उत्पादन गर्न द्रुत गतिमा काम भइरहेको नीलगिरि जलविद्युत्का प्रतिनिधि उपेन्द्र गौतमले जानकारी दिनुभयो  । दुवै गरी करिब १६ अर्ब रुपियाँ लागत अनुमान गरिएको छ । कोरोना सङ्क्रमणका कारण बन्दाबन्दी नभएको भए उत्पादन नै सुरु भइसक्ने थियो, गौतमको दाबी छ ।

निर्माणाधीन घार खोला १४ मेगावाटका लागि दुई अर्ब ४० करोड रुपियाँ लगानी हुँदैछ । त्यस्तै ४२ मेगावाटको मिस्त्री खोला जलविद्युत् निर्माणका लागि रुवर्टस् इनर्जी लिमिटेडले छ अर्ब ५४ करोड रुपियाँ लगानी गर्दैछ । उक्त जलविद्युत्को निर्माण कार्य करिब ९८ प्रतिशत सकिएको कम्पनीका प्रतिनिधि चुडामणि निरौलाले बताउनुभयो ।

म्याग्दीमा विद्युत् उत्पादनका लागि हालसम्म १५ वटा कम्पनीले निर्माण सुरु गर्ने अनुमति लिएकोमा सबैले काम भने थालेका छैनन् । राहुघाट, मिस्त्री खोला, दरवाङ म्याग्दी खोला, घार खोला, माथिल्लो राहुघाट र नीलगिरि लगायतको काम थालनी भएको छ ।

यसैगरी मध्य कालीगण्डकी, ठूलो खोला हाइड्रो, माथिल्लो म्याग्दी–पहिलो, कालीगण्डकी गर्ज, रेले खोला आयोजना भने निर्माणको तयारीमा रहेका छन् । रुप्से खोला जलविद्युत्का लागि भने विरोध भएको छ । पर्यटकीय रुप्से झरनाको पानी झरनाभन्दा माथिबाटै लैजान लागिएपछि स्थानीयवासीले उक्त आयोजनाको विरोध गरिरहेका छन् ।

विभागका सूचना अधिकारी रिजालका अनुसार हाल म्याग्दी जिल्लाभित्रका विभिन्न १७ वटा जलविद्युत्का लागि सर्भे लाइसेन्स जारी भएको छ । म्याग्दीको चिम खोला, कुइनेमङ्गले, मुना, मुदी, नारच्याङ, दाना, गुर्जा, दरवाङमा विद्युत् उत्पादनका लागि सर्भे गर्नका लागि लाइसेन्स लिएका छन् । कुल १५ वटा विद्युत् कम्पनीले भौतिक निर्माणको लाइसेन्स (अनुमति) लिएर काम थालेका छन् ।- गोरखापत्र अनलाईन


प्रतिक्रिया दिनुहोस !


अध्यात्मिक शिक्षाले मानव कल्याण र विश्व शान्तिको मार्ग देखाउँछः मुख्यमन्त्री राउत



जनकपुरधाम, ६ कात्तिक

प्रदेश २ का मुख्यमन्त्री लालबाबु राउतले भौतिकवादी युगमा मानिसलाई अहिंसाको बाटोमा डोर्‍याउन अध्यात्मिक शिक्षाको महत्व रहेको बताएका छन् ।

जनकपुरधाम उपमहनगरापालिका–१४ मुजेलियास्थित ब्रह्मकुमारी राजयोग सेवा केन्द्र जनकपुरद्वारा मुजेलियामा नवनिर्मित प्रशिक्षण केन्द्र ॐ शान्ति मिथिला बाटिकाको शनिबार उद्घाटन समारोहमा मुख्यमन्त्री राउतले भने, ‘कुनै पनि धर्मका धार्मिक शिक्षाले मानिसलाई अहिंसाको मागमा चल्न सिकाउछन् । धार्मिक शिक्षाले पनि समाजलाई जोड्छ,धार्मिक सदभाव बढाउछन, भाइचारा, मानव कल्याण र विश्व शान्तिको वकालत गर्छन् ।’

पाँच कठ्ठा क्षेत्रफलमा चार करोड पचास लाखको लागतमा निर्माण भएको उक्त भवनमा राजयोग सेवा केन्द्रसँग सम्बन्धित प्रशिक्षणहरु सञ्चालन हुने जनाइएको छ । सेवा केन्द्रको नेपाल निर्देशक राज दादी मा को अध्यक्षतामा भएको उद्घाटन समारोहमा प्रदेशसभा सदस्य सत्रुधन महतो, राम अशिष यादव , परमेश्वर साह, शारदा थापासहित समाजसेवीको सहभागिता थियो ।

प्रतिक्रिया दिनुहोस !

कांग्रेसद्वारा कुशवाहामाथि दुव्र्यवहार गर्नेउपर कारवाहीको स्वागत



नेपाली कांग्रेसले खानेपानी तथा ढल व्यवस्थापन आयोजना कार्यालय जनकपुरका प्रमुख राजेश कुशवाहामाथि दुव्र्यवहार गर्ने दोषीलाई कानुनी कारवाही गर्न सरकारले अघि बढाएको प्रक्रियाको स्वागत गरेको छ ।

कांग्रेस प्रवक्ता विश्वप्रकाश शर्माले आज एक विज्ञप्तिमार्फत राजनीति, प्रशासन तथा समग्र समाजमा रहेका बेथितिविरुद्ध प्रश्न उठाउनु र स्वच्छ समाजको खोजी गर्नु सबैको कर्तव्य भएको उल्लेख गर्दै कानुन हातमा लिने, बलजफती र हुल हुज्जत गर्ने कार्य भने सभ्य समाजको परिचायक हुन नसक्ने बताउनुभएको छ ।

यस्तो घटना आपत्तिजनक र निन्दनीयसँगै कडा कारवाहीको विषय बन्ने जनाउँदै उहाँले जनकपुरको घटनाले नेपाली इञ्जिनीयर, कर्मचारी र सभ्य समाजमा विश्वास गर्ने सबैलाई मर्माहत बनाएको उल्लेख गर्नुभएको छ ।

कांग्रेसले सहकर्मीउपर गम्भीर दुव्र्यवहार हुँदा इञ्जिनीयर आक्रोशित र आन्दोलित हुनु स्वभाविक भएको जनाउँदै सुरु कानुनी कारवाहीसँगै राज्यको सक्रियताले यसलाई सम्बोधन गर्ने विश्वास लिएको छ । शान्तिपूर्ण राजनीतिमा सहभागी हुने उद्घोष गरेका हरेक दल र संस्थाले आफ्ना समर्थक तथा सदस्यलाई तदनुकूलको संस्कार र व्यवहारमा रुपान्तरण गर्नु सम्बन्धित दल नेतृत्वको कर्तव्य हुने कांग्रेसले स्मरण गराएको छ ।

हुलहुज्जतको बाटोबाट समुन्नत समाजमा पुग्न नसकिने उल्लेख गर्दै कांग्रेसले हरेक दल, नेतृत्व, सदस्य, समर्थक र नागरिकले यसलाई गहिरो आत्मसात् गर्नुपर्ने आवश्यकताका साथ थप सजगता तथा कडाइका लागि सरकारसँग अपिल गरेको छ ।

प्रतिक्रिया दिनुहोस !

सहकारीका माध्यमबाट जनताको जीवनस्तर उठाउनुपर्छ : ऊर्जामन्त्री भुसाल



ऊर्जा, जलस्रोत तथा सिँचाइमन्त्री पम्फा भुसालले सहकारीका माध्यमबाट गरिबीको रेखामुनि रहेका जनताको जीवनस्तर माथि उठाउन सहिने बताउनुभएको छ ।

सरकारले आर्थिक, सामाजिक न्याय तथा गरिबी न्यूनीकरणका लागि सार्वजनिक, निजी र सहकारीसहित तीन खम्बे अर्थनीति अवलम्बन गरेको उल्लेख गर्दै मन्त्री भुसालले सहकारी क्षेत्रले आर्थिकरूपमा बिपन्न परिवारलाई सहयोग गर्नुपर्नेमा जोड दिनुभयो ।

प्रतिभा बहुउद्देश्यीय सहकारी संस्था लिमिटेडको २१औँ वार्षिक साधारसभाको उद्घाटन गर्दै मन्त्री भुसालले भन्नुभयो, “सहकारीका माध्यमबाट आर्थिक सशक्तीकरण गर्नुपर्छ, सामाजिक न्यायमा आधारित समतामूलक समाज निर्माणमा यस क्षेत्रले भूमिका खेल्नुपर्छ ।” सहकारीले गरिब परिवारलाई सीप र रोजगारी उपलब्ध गराएर जीवनस्तर माथि उठाउनुपर्नेमा उहाँको जोड थियो ।

आर्थिक अधिकारमा महिलाको समान पहुँच नभएको भन्दै उहाँले विगतमा अधिकारका लागि सङ्घर्ष गरेको र अब अधिकार कार्यान्वयनका लागि सङ्घर्ष गर्नुपर्ने समय आएको बताउनुभयो । उहाँले भन्नुभयो, “हामीले प्राप्त गरेका राजनीतिक, आर्थिक र सामाजिक अधिकार घरपरिवारबाटै कार्यान्वयन गर्नुपर्छ, अधिकार कार्यान्वयनको जागरुकता राख्नुपर्छ ।”

सो अवसरमा संस्थाका अध्यक्ष माधवप्रसाद तिमल्सिनाले आर्थिक वर्ष २०७६/७७ मा महिला सदस्य आठ हजार २५ र पुरुष सदस्य एक हजार ६२४ रहेकामा आव २०७७/७८ मा सदस्यता वृद्धि भई महिला सदस्य आठ हजार १७९ र पुरुष सदस्य तीन हजार ४२३ गरी जम्मा ११ हजार ६०२ सदस्य संस्थामा आबद्ध भएको जानकारी दिनुभयो ।

आव २०७६/७७ मा रु पाँच करोड ५५ लाख ८८ हजार १०० शेयर पुँजी सङ्कलन भएकामा आव २०७७/७८ असार मसान्तसम्ममा रु एक करोड ४१ लाख २९ हजार ७०० सेयर पुँजी वृद्धि भइ हाल संस्थाको शेयर पुँजी रु छ करोड ९७ लाख १७ हजार ८०० पुगेको छ ।

संस्थाले २०७६/७७ मा रु ५४ करोड १८ लाख ४४ हजार ९२४ बचत सङ्कलन गरेकामा आव २०७७/७८ असार मसान्तसम्ममा रु आठ करोड ७५ लाख ६६ हजार ९१० वृद्धि भई हाल संस्थाको बचत निक्षेप रु ६२ करोड ९४ लाख ११ हजार ८३५ पुगेको छ ।

आव २०७६/७७ मा रु ४० करोड तीन लाख ६३ हजार ६१७ कर्जा लगानी गरिएकामा आव २०७७/७८ सम्ममा संस्थाको लगानीमा रहेको कर्जा रु ६९ करोड २४ लाख ३५ हजार ४६१ पुगेको उल्लेख गरिएको छ । सो अवसरमासरोकारवालाले सहकारीका माध्यमबाट गरिबी न्यूनीकरण तथा समृद्धिमा महत्वपूर्ण योगदान गर्ने विश्वास व्यक्त गर्नुभएको थियो ।

प्रतिक्रिया दिनुहोस !

ताजा

लोकप्रिय

%d bloggers like this: