शपथग्रहणअघि शीतल निवासमा किन भएको थियो चर्काचर्की ? « Name of Truth News : News Portal in Nepal
   ४ कार्तिक २०७८, बिहीबार
 |   Thu Oct 21 2021
Logo

शपथग्रहणअघि शीतल निवासमा किन भएको थियो चर्काचर्की ?



मंगलबार अपरान्ह ५ बजे राष्ट्रपति कार्यालयबाट जारी सूचनामा शेरबहादुर देउवालाई संविधानको धारा उल्लेख नगरी प्रधानमन्त्रीमा नियुक्त गरेको व्यहोरा लेखिएपछि हंगामा मच्चियो । साँझ ६ बजे भनिएको शपथ ग्रहण समारोह राष्ट्रपति कार्यालयको भित्री कोठामा भएको चर्काचर्कीका कारण झण्डै अढाई घण्टा पर सरेको हो ।

अदालतको फैसलाबमोजिम भन्ने वाक्यमा टेकेर अप्ठ्यारो पार्न खोजिएको भन्ने नेताहरूको टिप्पणीपछि राष्ट्रपति विद्यादेवी भण्डारी आफै अप्ठेरोमा पर्नुभएको बताइन्छ । सूचना नसच्चिएसम्म शपथ नखाने देउवाको अडानपछि आगन्तुकहरू समारोहस्थलमा झण्डै तीन घण्टादेखि बिलखबन्दमा परेका हुन् ।

भित्रको अर्को कोठामा त्यसैगरी प्रधानन्यायाधीश चोलेन्द्रसमशेर राणा,सभामुख अग्निप्रसाद सापकोटा,राष्ट्रिय सभाका अध्यक्ष गणेशप्रसाद तिमिल्सिना र नवनियुक्त प्रधानमन्त्री शेरबहादुर देउवा पनि त्यसैगरी राष्ट्रपतिलाई कुरेर बसिरहनु भएको थियो । एमाले वरिष्ठ नेता तथा पूर्वप्रधानमन्त्री माधवकुमार नेपाल र माओवादी केन्द्रका अध्यक्ष पुष्पकमल दाहाल प्रचण्ड भने समारोह स्थलको अगाडिको भागको कुर्सीमा बसिरहनुभएको थियो ।

त्यहि बीचमा काँग्रेस नेतृ पुष्पा भुसाल हतारिँदै आएर नेपालसँग सोध्नुभयोे, ‘राष्ट्रपति कार्यालयमा कसलाई भन्ने ? यो पाराले त भएन,पत्र नसच्चिएसम्म शपथ हुँदैन भनेर कसलाई भन्ने ?’ भुसालले त्यसो भन्नेबित्तिक्कै नेपालले राष्ट्रपतिका सञ्चारविज्ञ टीका ढकाललाई बोलाइदिनुभयो । ढकाल नेपाल नजिकै आएपछि उहाँले भनेको सुनियो, ‘यो चिठी मिलेको छैन रे,मिलाउन भनिदिने कि !’

उता भित्र संवैधानिक अंगका प्रमुखसहित देउवा बस्नुभएको कोठामा पनि राष्ट्रपति आउन झण्डै एक घण्टा ढिला भयो । उहाँ त्यहाँ आएपछि शपथ ग्रहण समारोहस्थलमा रहनुभएका नेपाल र दाहाललाई पनि भित्रबाट बोलावट आएको देखियो ।

शपथ ग्रहण रोकिएका प्रधानमन्त्रीसहित प्रधानन्यायाधीश,सभामुख, राष्ट्रियसभाका अध्यक्ष भएको ठाउँमा नेपाल र प्रचण्ड पुग्नुभयो । तर राष्ट्रपति त्यहाँ हुनुहुन्थेन ।

धेरै बेरको कुराइपछि राष्ट्रपति त्यो कोठामा छिर्नुभयो । लगत्तै देउवाले त्यहि कुरो उठाउनुभयो तर राष्ट्रपतिले ‘हैन,यो त त्यस्तै पो हो’ भनेर जवाफ फर्काउनुभएको थियो । उहाँले थप्दै देउवालाई आश्वस्त पार्दै भन्नुभयो, ‘सर्वोच्चको फैसलालाई नै हो आधार मान्ने, सबैले त्यहि भन्छन् ।’

त्यसपछि देउवा,नेपाल,दाहाल र राष्ट्रपतिबीच अर्को कोठामा एकछिन कुराकानी भयो । त्यहाँ प्रधानन्यायाधीशलाई बोलाउने कुरो भयो तर,राष्ट्रपतिले ‘पर्दैन’ भनेपछि उहाँहरूबीच मात्र कुरो भएको बताइन्छ । सबैलाई उहाँले सोध्नुभयो । तीनै जनाले धारा ७६ (५) उल्लेख हुनैपर्छ भन्नुभयो । ‘ल ठीक छ,त्यसो भए, भेषराजजीलाई भित्र पठाइदिनुस्’ भनेर राष्ट्रपतिले अह्राउनुभयो । नेता नेपाल र उपेन्द्र यादव त्यहाँबाट बाहिर निस्कनुभयो । तर शेरबहादुरसँगै प्रचण्ड भने भित्रै बसिरहनुभयो ।

त्यसपछि फेरि एक घण्टा कुरेपनि शपथको कुनै छेकछन्द देखिएन । यसवीच भित्र देउवा र दाहालसँग राष्ट्रपतिको चर्काचर्की परेको बताइन्छ । राष्ट्रपति र प्रचण्डबीच पनि निकै ठूलो स्वरमा कुरा भएको कोठा बाहिर बसेकाले समेत सुनेका थिए ।

स्रोतले भनेको छ,‘काँपेको स्वरमा माधव नेपालको नाम लिँदै उहाँले प्रचण्डसँग चर्काचर्की गर्नुभएको हो ।’ ‘तपाईंहरू माधव नेपालसँग पार्टी मिलाएर एकै ठाउँमा आउँदै हुनुहुन्छ नि होइन ? भनेर दाहालसँग उहाँले सोधनी गर्नुभएको थियो ।’

शेरबहादुरसँगको कुराकानीमा पनि राष्ट्रपतिले नेपालको आलोचना गर्नुभएको बताइन्छ । सम्भवतः पछिल्लो राजनीतिक घटनाक्रम सबै नेता नेपालको सहयोगमा भएको लागेपछि उहाँले दाहाल र देउवामाथि असन्तुष्टि पोख्नुभएको बताइन्छ ।

त्यसपछि शपथ ग्रहण कार्यक्रम भए पनि उहाँ नयाँ प्रधानमन्त्रीको मुखतिर पनि नहेरी र बधाई पनि नदिई अर्को कोठामा जानुभएको थियो । नयाँ प्रधानमन्त्रीलाई संवैधानिक अंगका प्रमुखहरूसँग परिचय पनि नगराई अर्को कोठामा लैजान कार्यक्रम सञ्चालक तथा सचिवलाई अह्राइएको थियो । जुन सामान्य शिष्टाचार अनुकूल नरहेको यसअघिका शपथ ग्रहण समारोहमा देखिएको दृश्यले पनि बताउँछ ।

राष्ट्रपतिलगायत सबै संवैधानिक अंगका प्रमुख देउवालाई त्यहिँ छाडेर भित्रको कोठामा छिरेपछि सबैभन्दा पहिले नेता नेपालले प्रधानमन्त्रीलाई बधाई दिनुभएको हो । नेता नेपालले हात मिलाउन खोज्दा देउवा तर्किनुभएको थियो । तर माधवले यो खुशीमा ‘मिलाउनुस्’ भनेपछि देउवाले हात दिनुभएको नजिकैकाले समेत सुनेका थिए ।

बालुवाटारमा बसेर त्यही दृश्य टेलिभिजनमा हेरिरहनुभएको निवर्तमान प्रधानमन्त्री केपी शर्मा ओली भने आगो हुनुभएको थियो । देउवाले हात मिलाउन नखोज्दा पनि नेपालले हात मिलाएको भन्दै ओली आगो भएको बालकोट स्रोतले बताएको छ । त्यसपछि मात्र प्रचण्डले देउवालाई बधाई दिनुभएको थियो ।- जनआस्थाबाट साभार 


प्रतिक्रिया दिनुहोस !


एमालेको दशौँ महाधिवेशनको स्थान फेरियो



काठमाडौं । नेकपा एमालेले आगामी मंसिरमा बुटवलमा गर्ने तय भएको दसौँ राष्ट्रिय महाधिवेशनको स्थान परिवर्तन भएको छ । महाधिवेशन बुटवलको साटो चितवनमा हुने भएको छ । विहीबार बसेको स्थायी कमिटीको बैठकले दसौँ महाधिवेशन बुटवलबाट चितवन सार्ने निर्णय गरेको हो । बिहीबारको स्थायी कमिटी बैठकले असोज १५–१७ गते गोदावरीमा सम्पन्न विधान महाधिवेशनको समीक्षा गरेको बैठक पछि एक नेताले जानकारी दिए ।

साथै, १० बुँदे सहमतिका विषयमा विहिबारको बैठकमा छलफल हुने एक स्थायी कमिटी सदस्यले बताए । बुधबार एक कार्यक्रममा अध्यक्ष केपी शर्मा ओलीले १० बुँदको औचित्य सकिएको बताएपछि तेस्रो धारका नेताहरु असन्तुष्ट देखिएका छन् ।​ यसैबीच दसौँ महाधिवेशन सफल पार्नका लागि रामबहादुर थापा बादलको संयोजकत्वमा २१ सदस्यीय मूल व्यवस्थापन कमिटी पनि गठन गरिएको बैठकपछि पार्टीका प्रवक्ता प्रदीप ज्ञवालीले पत्रकारहरुलाई जानकारी दिए ।

प्रतिक्रिया दिनुहोस !

पचास प्रतिशत बढी जापानीहरु चीनको पक्षमा, अमेरिका मुख्य बाधक भएको ठहर



काठमाडौं । अधिकांश जापानीहरु अमेरिकाभन्दा चीनसँग नजिक हुनु पर्ने पक्षमा रहेको चिनिँया समाचार संस्था ग्लोबल टाईम्सले दाबी गरेको छ । सन् २०२१ मा चीन जापान सम्बन्ध जनमत सर्वेक्षणको नतिजा बुधवार बेइजिंग र टोकियोमा जारी गरिएको थियो । अनुसन्धानले पचास प्रतिशत बढी मानिसहरु अमेरिकाभन्दा चीनसँग नजिक हुनु पर्ने पक्षमा रहेका छन् । सो सर्वेक्षणमा सहभागी अधिकांश जापानीहरुले अमेरिका नै चीन र जापानको सम्बन्धमा मुख्य अवरोध रहेको बताएका छन् ।

सन् २००५ मा शुरू भएको वार्षिक सर्वेक्षण, दुई देशहरुको लागि सार्वजनिक राय बुझ्न र आपसी समझदारीको बढावाको लागि अध्ययन थालेको थियो । यस वर्षको सर्वेक्षण चीनको विदेशी भाषा प्रकाशन प्रशासन र एक जापानी थिंकट्यांक जेनरोन एनपीओले अगस्टको अन्त्यदेखि सेप्टेम्बरको अन्त्यसम्म दुई देशमा संयुक्त रूपमा सर्वेक्षण सञ्चालन गरिएको थियो। चीन र जापान दुबै देशका उत्तरदाताहरु द्विपक्षीय सम्बन्धको महत्वमा उच्च प्राथमिकतामा राखेका थिए । क्षेत्रीय सहयोग र वैश्विक चुनौतिहरुको विषयमा चिन्ता देखाएका थिए ।

सर्वेक्षणमा ७०.९ प्रतिशत चिनियाँ र ६४.४ प्रतिशत जापानी उत्तरदाताले चीन र जापान द्विपक्षीय सम्बन्ध महत्वपूर्ण रहेको बताए । त्यस्तै विश्वव्यापी महामारीको बीचमा जापानले टोकियो ओलम्पिकको सफल आयोजना गरेकोमा चिनियाँ उत्तरदाताहरुले उच्च प्रशंसा व्यक्त गरेका छन्। सर्वेक्षणले ८०.६ प्रतिशत चिनियाँ र ५६.४ प्रतिशत जापानीहरुले इतिहासलाई चीन र जापान सम्बन्धमा एक प्रमुख समस्याको रुपमा लिएका छन् । जबकि ६२.४ प्रतिशत चिनियाँ र ५६.७ प्रतिशत जापानीहरुले सीमा दुई देशको बीचमा भएको सीमा विवादलाई सम्बन्धमा बाधा पर्ने सबैभन्दा महत्वपूर्ण मुद्दा भनेका छन् । एसियाको क्षेत्रीय मामिलामा कोरियाली प्रायद्वीपको परमाणु निशस्त्रीकरण, चीन र जापान समुद्री र वायु संकट व्यवस्थापन, उर्जा संरक्षण र वातावरणीय संरक्षण दुबै पक्षमा उत्तरदाताहरुको मुख्य चासो थियो।

प्रतिक्रिया दिनुहोस !

मुख्यमन्त्रीको विश्वासको मतसम्बन्धी प्रस्तावमा मतदान नगरी प्रदेशसभा बैठक स्थगित



काठमाडौं । मुख्यमन्त्री अष्टलक्ष्मी शाक्यको विश्वासको मतसम्बन्धी प्रस्तावमाथि मतदान नगरी बागमती प्रदेशको प्रदेशसभा बैठक कात्तिक १० गतेसम्म स्थगित भएको छ । बिहीबारको बैठकमा मुख्यमन्त्री शाक्यले राखेको विश्वासको मतसम्बन्धी प्रस्तावमा छलफल सकिएपछि सभामुख सानुकुमार श्रेष्ठले कात्तिक १० गतेसम्मका लागि बैठक स्थगित गरिदिएका हुन् ।

बैठकमा मुख्यमन्त्री शाक्यले आफूलाई विश्वासको मत दिन प्रदेशसभासमक्ष प्रस्ताव गरेकी थिइन् । तर विपक्षी गठबन्धनमा रहेका नेकपा माओवादी केन्द्र संसदीय दलका नेता शालिकराम जम्मकट्टेल, नेपाली कांग्रेस संसदीय दलका नेता ईन्द्रबहादुर बानियाँ, नेकपा एकीकृत समाजवादी संसदीय दलका नेता राजेन्द्र पाण्डे र जनता समाजवादी पार्टीका सांसद प्रेमबहादुर तामाङले मुख्यमन्त्री शाक्यलाई विश्वासको मत दिन नसक्ने बताएका थिए ।

प्रतिक्रिया दिनुहोस !

ताजा

लोकप्रिय

%d bloggers like this: