गत भदौ २० गतेदेखि सवारी अनुमति पत्र लाइसेन्सका लागी ट्रायल परीक्षा सञ्चालन भएपनि नयाँ आवेदन भने तत्काल नखुलाउने निर्णय भएको छ ।
यातायात व्यवस्था विभागले पुराना रोकिएका लाइसेन्स आवेदन तथा लिखित दिएर बसेका सेवाग्राहीको प्रयोगात्मक परीक्षा नसकी नयाँ आवेदन खुल्ला नगर्ने जनाएको हो ।
गत बर्ष काेरोना महामारीले १० महिना बन्द भएर चार महिना खुलेपछि लाइसेन्स अवेदन तथा ट्रायल परीक्षा दिन सेवाग्राहीको चाँप अत्याधिक छ । सोहि ४ महिनामा १० लाख बढी सेवाग्राहीले नयाँ लाइसेन्सका लागि आवेदन दिएका छन्।
तर, सोहि समयमा लिइएको आवेदन थेग्न उपत्यकाका यातायात कार्यालय तथा यातायात व्यवस्था विभागलाई हम्मेहम्मे परेको छ ।
सोहि अवधिमा ट्रायल परीक्षा र लाइसेन्सका लागी आएको आवेदनको चाँप बढी भएकाले विभागले तत्कालै नयाँ अनलाइन तथा भौतिक रूपमा सवारीचालक अनुमति पत्र आवेदन खुलाउन नसकेको यातायात व्यवस्था विभागका प्रवक्ता लोकनाथ भुसालले जानकारी दिए ।
कोरोनाको दोस्रो लहरका कारण बैशाख १६ देखि भएको निषेधाज्ञाले अधिकांश आवेदन रोकेको थियो । हाल तिनै लिखित दिएर बसेका, यातायात भिजिट डेटा पाएका तथा ट्रायल परीक्षाको लागि समय लिएका सेवाग्राहीकाे ट्रायल परीक्षा सञ्चालनमा छ ।
यातायात व्यवस्था विभागका अनुसार यस्ता सेवाग्राही चार लाख हाराहारीमा रहेकाको ट्रायल परिक्षा सञ्चालनमा छ । अर्को तर्फ नयाँ लाइसेन्सका लागी मात्रै अनलाइनबाट १० लाख बढीले आवेदन दिएका छन ।
विभागले उपत्यकाका यातायात कार्यालयहरुसँगको छलफलमा आगामी मंसिर भित्र पुरानो सवारी चालक अनुमति पत्र आवेदनको ट्रायल परीक्षा सक्ने र त्यसपछि मात्रै नयाँ आवेदनको लागी ढोका खोल्ने विभागका निर्देशक भुसालको भनाई छ ।
कारोना भाइरस महामारीका लागी जोखिम रहेको भन्दै यातायात कार्यालयले सीसीएमसीको निर्णय अनुसार ५० प्रतिशत मात्रै सेवाग्राहीलाई राखेर सेवा उपलब्ध गराउन निर्देशन दिएको छ ।
नयाँ तथा पुराना गरेर हाल नेपालमा १५ लाख हाराहारीमा स्मार्ट लाइसेन्सको पर्खाइमा रहेको यातायात व्यवस्था विभागले जनाएको छ ।
अंक प्रणाली पनि अन्योल
यातायात व्यवस्था विभागले गत बैशाखमा सवारीचालक अनुमति पत्र निर्देशिका २०७८ जारी गर्यो सवारी चालक अनुमति पत्र ट्रायल परीक्षामा अंक प्रणाली पनि केहि समयको लागी स्थगित भएको छ ।
सवारीचालक अनुमति पत्र सम्बन्धी निर्देशिका आउनुभन्दा अघिदेखिकै आवेदन र पहिलाकै ट्रायल प्रणालीमा आधारित भएकाले अब दिने आवेदकको हकका मात्रै सो प्रणाली लागु हुने भएको हो ।
अहिले परीक्षाका लागि प्रक्रिया पूरा गरेर बसेका सेवाग्राहीहरूले यातायात व्यवस्था कार्यविधि २०६० (संशोधनसहित) अनुसार परीक्षा दिनका लागि फारम भरेका छन । जसले गर्दा तत्काल नयाँ प्रावधान लागु नगर्ने भएको हो ।
विभागले अब नयाँ ट्रायल प्रणालीको लागी नयाँ फारम भर्नेहरूको हकमा भने प्रयोगात्मक परिक्षामा अंक प्रदान लागु गर्ने र पास/फेलको निर्णय गर्ने गरी विभाग लागिपरेको छ ।
