नेपाली कांग्रेसका नवनिर्वाचित महामन्त्री विश्वप्रकाश शर्माले सुन्दरीजलस्थित बिपी सङ्ग्रहालय पुगेर पार्टीका संस्थापक नेता बिपी कोइरालालगायत नेताको सालिकमा माल्यार्पण गर्नुभएको छ ।
पार्टीको निर्वाचन समितिले शर्मा महामन्त्रीमा निर्वाचित भएको घोषणा गरेलगत्तै उहाँ नेता कार्यकर्ता एवं परिवारसहित सङ्ग्रहालय पुग्नुभएको थियो । सङ्ग्रहालयमा उहाँले प्रथम जननिर्वाचित प्रधानमन्त्री बिपी, सर्वोच्च नेता गणेशमान सिंह, सन्त नेता कृष्णप्रसाद भट्टराई, नेता योगेन्द्रमान शेरचन, दिवानसिंह राई, रामनारायण मिश्रलगातको सालिकमा माल्यार्पण गर्नुभएको हो ।
महामन्त्री शर्माले बिपीले रोप्नुभएको कपुरको रुखमा पानी पनि हाल्नुभएको थियो । उहाँले गत भदौ २४ गते बिपी जयन्तीको अवसर पारेर सङ्ग्रहालयमै महामन्त्री पदमा उम्मेद्वारी घोषणा गर्नुभएको थियो । वैदिक विधिपूर्वक पूजाआजासहित सङ्ग्रहालय परिसरमा रुद्राक्षको बिरुवा रोपेर उम्मेद्वारी घोषणा गर्नुभएका नेता शर्माले आज महामन्त्रीमा निर्वाचित भएपछि पनि यही स्थानमा उपस्थित भएर पार्टीका संस्थापक नेताहरुलाई सम्झनुभएको हो ।
बिपी र युवाको सपना एकाकार गरेर कांग्रेस अघि बढाउँछु ः
विसं २०१७ पुस १ गते अर्थात् आजैका दिन तत्कालीन राजा महेन्द्रले प्रजातन्त्रमाथि नेपाली सेनाको शक्तिका भरमा कू गरी बिपीलगायत नेतालाई बन्दी बनाइएको जेललाई अहिले बिपी सङ्ग्रहालय घोषणा गरिएको छ । यही सम्भनामा कांग्रेसलगायत प्रजातन्त्रप्रेमीले आजको दिनलाई कालो दिनका रुपमा मनाउँछन् ।
सङ्ग्रहालयमा आज आयोजित कार्यक्रमलाई सम्बोधन गर्नुहुँदै महामन्त्री शर्माले पार्टीका संस्थापक नेता बिपी र वर्तमान युवाको सपना एकाकार गरेर कांग्रेसलालाई अघि बढाउने बताउनुभयो ।
“कांग्रेस र देश दुवैमा रुपान्तरणको आवश्यकता छ, राजनीतिक परिवर्तनको नेतृत्व गरेको कांग्रेसले अब विकृति, विसङ्गति अन्त्यको नेतृत्व लिएर सामाजिक रुपान्तरण गर्नेछ, राजनीतिमा गुम्दै गएको सहिष्णुता पुनस्र्थापनाका लागि पनि पार्टीमा निर्वाचित महामन्त्रीका नाताले म र गगन थापा क्रियाशील हुनेछौँ”, उहाँले भन्नुभयो ।
महामन्त्री पदमा उम्मेद्वारी घोषणा गर्ने क्रममा आफूले अघिसारेका नीति निर्माणमा पार्टीका तर्फबाट आगामी नीति महाधिवेशनमा अर्का महामन्त्री थापाकोसमेत सहयोग लिएर प्रस्ताव पेश गर्ने जानकारी पनि शर्माले गराउनुभयो । कांग्रेसलाई प्रविधि मैत्री बनाउन पार्टीको सञ्चार तथा सूचना विभागको प्रमुखको नाताले आफूले अघि सारेको कार्यक्रमलाई अब महामन्त्री भएर पूर्णता दिने प्रतिबद्धता पनि उहाँले जनाउनुभयो ।
कार्यक्रममा भोजपुर कांग्रेसका सभापति बिनोद वान्तवा, सङ्ग्रहालयका अध्यक्ष परशुराम पोखरेल, वाग्मती प्रदेश महाधिवेशन प्रतिनिधि सुशील सिम्खडालगायतले कांग्रेसलाई रुपान्तरण गर्ने अभियानमा महामन्त्री शर्मालाई साथ दिने प्रतिबद्धता जनाउनुभएको थियो ।
