काठमाडौं । म्यानमारकी प्रजातन्त्रवादी नेतृ आङ साङ सुकीको जेल सजाय अवधि आधा घटाइएको छ । अब नेतृ सुकीलाई २ वर्ष मात्रै जेल राखिनेछ ।
म्यानमारको सैनिक अदालतले नेतृ सुकीलाई सोमबार चार वर्ष जेल सजाय सुनाएको थियो । उक्त फैसलामा सुनाईको जेल अवधिमा आधा कट्टा गरिएको छ ।
सैनिक अदालतले गरेकाे उक्त निर्णय बारे म्यानमारको राष्ट्रिय टेलिभिजनहरुले पनि पुष्टि गरेका छन् । सोमबार म्यानमारको न्यपेतस्थित सेनाको अदालतले सुकीलाई दुई फरक फरक आरोपमा समान ४ वर्षको जेल सजाय सुनाएको थियो ।
७६ वर्षीया सुकीलाई गत फेब्रुअरीमा सेनाले कू गरेर सत्ता कब्जा गरेपछि नजरबन्दमा राखिँदै आएको थियो । म्यानमारको सेनाले उनीविरुद्ध विभिन्न करिब एक दर्जन आरोपमा मुद्दा दायर गरेको थियो।
तर उनले आफूमाथि लाग्दै आएको आरोपको खण्डन गर्दै आएकी छन् ।
